Ámiwdárya rayonı “Tolqın” awıl puqaralar jıyını aymaǵındaǵı “Tajimuratov Ismoil” fermer xojalıǵı atızlarında jumıs qızǵın. Tınımsız miynetler óz nátiyjesin berip, joqarı zúráát alıw imkaniyatı jaratılmaqta. Atap aytqanda, aldınları 1 gektar maydanǵa egilgen kartoshkadan tek ǵana 20-25 tonnaǵa shamalas ónim alınǵan bolsa, endi awıl xojalıǵında ámelge asırılıp atırǵan keń kólemli jumıslar, tuqımgershilikti rawajlandırıw baǵdarındaǵı innovaciyalıq ideyalar nátiyjesinde bir gektardan 50 tonnaǵa shamalas ónim alınbaqta.

Rayonda Tuqımgershilikti rawajlandırıw orayı hám qánigeler menen birgelikte kartoshka jetistiriwdi jetilistiriw boyınsha áhmietli tájiriybe ámelge asırılıp atırǵanı dıqqatqa ılayıq.

– Bizge belgili, kartoshka eń áhmietli azıq-awqatlıq egin bolıp esaplanadı, – deydi Tuqımgershilikti rawajlandırıw orayınıń bas qánigesi Berdibek Naubiev. – Onda insan organizmi ushın paydalı bolǵan kraxmal, uglevod, belok, mineral duzlar hám basqa da zatlar bar. Kartoshkadan xalıq tutınıwında jıl dawamında paydalanıladı. Tuqımgershilikti rawajlandırıw orayı tárepinen fermerlerimizge “Arizona” Elita sortın egiw boyınsha usınıslar berip barılmaqta.

Sebebi, bul kartoshka sortı biziń klimat sharayatımızǵa beyimlesken. Bıyılǵı salqın hawa-rayı hám jawın-shashınlar usı kartoshka sortınıń ónimdarlıǵın arttırmaqta.

– 2026-jıl ónimi ushın 200 fermer xojalıǵındaǵı 300 gektardan aslam jer maydanlarına kartoshka egildi, – deydi Ámiwdárya rayonı awıl xojalıǵı bólimi baslıǵınıń orınbasarı Rinat Xaytbaev. – Sonnan rayondaǵı 16 fermer xojalıǵınıń jámi 28 gektar jer maydanına tájiriybe sıpatında Gollandiyadan alıp kelingen “Arizona” Elita sortı egildi.

Búgingi kúnde aymaqtaǵı “Tajimuratov Ismoil” fermer xojalıǵınıń 1 gektar maydanında usı sort sınaqtan ótkerildi.

Qánigelerdiń dáslepki juwmaqlarına bola, bul maydannan gektarına 500 centnerge shekem ónim alıw imkaniyatı bar.

Atap ótilgenindey, Qaraqalpaqstannıń topıraq-ıqlım sharayatında kartoshka jetistiriw boyınsha bunday joqarı nátiyje aldın baqlanbaǵan. Sonlıqtan, bul “Arizona” sortın arnawlı suwıtqısh qoymaxanalarda saqlap, 2027-jıl ónimi ushın fermer xojalıqlarına jetkerip beriw rejelestirilgen.

Bul bolsa xalıq hám awıl xojalıǵı islep shıǵarıwshıların joqarı ónimdarlı kartoshka tuqımları menen turaqlı támiyinlewge xızmet etedi.

F.NURULLAEVA.