Elimizde qábiletli jaslardı anıqlaw, olardıń bilim potencialın arttırıw, isbilermenlik jumısın rawajlandırıw, jańa jumıs orınların jaratıw, bántligin támiyinlew, ásirese, olardıń isbilermenlik baǵdarındaǵı joybar hám baslamaların qollap-quwatlaw sistemalı jolǵa qoyılǵan.

Xojelilik Mavluda Abdullaeva mine usınday imkaniyatlardan keńnen paydalanıp kiyatırǵan belsendi hám umtılıwshań jaslardan. Ol balalıǵınan aq xalat kiyiwdi, shıpaker bolıwdı niet etti. Bul boyınsha tınımsız oqıdı, izlendi. Stomatologiya baǵdarın tańlaǵan Mavluda búgin óziniń jeke menshik “STOMA SMILE” klinikasına ie.

2019-jılı jumıs baslaǵan bul klinika rayon “Xalıq banki”nen alǵan 100 million sumlıq jeńilletilgen kredit qarjıları esabınan 2026-jılı jańa imaratqa kóshti. Nátiyjede, xızmet kórsetiw túrleri keńeytilip, jańa medicinalıq úskeneler satıp alındı, xalıqqa qolaylı sharayatlar jaratıldı. Házirgi waqıtta bul jerde 10 jastıń bántligi támiyinlengen.

– Tis shıpakeri yaǵnıy, stomatolog bolıwdı balalıqtan árman etkenmen. Ákem Eshniyaz Abullaev birinshi ustazım bolgan. Onıń qasınan hesh qashan qalmas edim. Ásirese, jumısına birge kelip, jumısların baqlap otıratuǵın edim, járdemlesetuǵın edim. Ákem júdá talapshań, ziyrek insan. Ol insannıń bay tájiriybesi, miynet súygishligi, adamlar menen qarım-qatnası, jumısqa bolǵan juwapkershiligi hám mehirin kórip mende de usı kásipke qızıǵıwshılıq oyandı. Mine, usı balalıqtaǵı ápiwayı baqlawlar, qızıǵıwshılıqlar sebepli, stomatologiya meniń ómirime, súyikli kásibime aylandı. Qalaberdi, elimizde jaslarǵa qaratılıp atırǵan itibar, jaratılıp atırǵan imkaniyatlar, ásirese, isbilermenlikti rawajlandırıw baǵdarındaǵı keń kólemli jumıslar sebepli jumısımdı jáne de keńeyttim, – deydi “STOMA SMILE” klinikasınıń baslıǵı Mavluda Abdullaeva.

Jas shıpakerdiń tınımsız izleniwleri, bilim tájiriybesi hám miyneti búgingi kúnde óz nátiyjesin bermekte.

Bul jerde tiykarınan tislerdi emlew, profilaktika, estetikalıq stomatologiya, ortopediya, ortodontiya, terapiya sıyaqlı zamanagóy xızmet túrleri kórsetiledi.

Mavluda nawqaslardı, ásirese, balalardı óziniń shiyrin sózi, shın kewilden sóylesiwi menen emleydi. Hár qıylı tiyeli denelerdi kórip, qorqınıshtan jılap atırǵan balanı tap óz balasınday erkelep, mehir kórsetip atırǵanı bul álbette shıpakerdiń kásipke sadıqlıǵı, mehir-muhabbatınıń ayqın úlgisi bolıp esaplanadı.

– Tislerdi salamat kútiw, olardıń tartımlı kórinisi hám uzaq múddet islewi ushın balalıqtan durıs awqatlanıw hám tisler gigienasına ámel etiwimiz zárúr. Bunda tislerdi durıs juwıw, durıs tis pastasın tańlaw, hár altı ayda bir shıpaker kóriginen ótip turıw áhmietli. Shegiwshilik, ishimlik, maylı hám quwırılǵan awqatlar bolsa tisler salamatlıǵına qáwip tuwdıradı, – deydi sáwbetlesimiz.

Búgin elimizde jaratılıp atırǵan imkaniyatlardan únemli paydalanıp kiyatırǵan ziyrek, isbilermen, belsendi hám kúsh-ǵayratlı jaslar oǵada kóp. Olardıń maqseti bir xalıq mápi jolında biyǵárez xızmet etiw bolıp tabıladı. Usı kózqarastan Mavluda Abdullaevanıń da umtılısları hám miynetleri keleshekte jańa tabıslarǵa tiykar jaratatuǵınına isenemiz.

Feruza NURULLAEVA.