Mámleketimizde belsendi, bilimli hám qábiletli jaslardı qollap-quwatlaw, joybar hám baslamaların ámelge asırıw, olardıń erkin bilim alıwı hám kásip-óner ielewi ushın qolaylı sharayatlar jaratıw baǵdarındaǵı jumıslar óz nátiyjesin bermekte.

Maqala qaharmanı Hurliman Qalibaeva da mine usınday imkaniyatlardan nátiyjeli paydalanıp kiyatırǵan qábiletli jaslardan. Itibarlısı, ol endi jańa oqıw jılın qatarları menen mektepte emes, al AQShtıń abıraylı joqarı bilimlendiriw mákemesinde student sıpatında dawam ettiredi.

Nókis qalasındaǵı 1-sanlı qánigelestirilgen mektep-internatınıń 9-klass pitkeriwshisi Hurliman Qalibaeva AQShtaǵı Mary Baldwin University janındaǵı Program for the Exceptionally Gifted (PEG) baǵdarlamasına qabıl etilip, Malone Scholarship stipendiyasınıń iesi boldı.

250 000 AQSh dolları muǵdarındaǵı grant Hurlimanniń universitettegi 4 jıllıq bilimlendiriw, jasaw qárejetleri, awqatlanıwı hám Study Abroad baǵdarlaması menen baylanıslı qárejetlerdi tolıq qaplaydı. Itibarlı tárepi, bul stipendiya pútkil dúnya boylap hár tórt jılda bir márte tek ǵana bir qábiletli oqıwshıǵa beriledi.

– Húrlimannıń bul tabısı bárshemizdi quwandırdı, – deydi klass basshısı Aysara Berdieva. – Til biliwi oǵan imkaniyatlar esigin ashtı. Hurliman júdá talapshań, umtılıwshań qız. Inglis, rus tiline mehri bólek. Til úyreniwge bolǵan ıqlası sebepli bárqulla izleniwde. Ol 7-klasınan baslap sırt mámleketlerdiń abıraylı joqarı oqıw orınlarına óz hújjetlerin tapsırıp keledi. Onıń bul arzıw-maqsetleri ámelge asıp, múddetinen aldın student bolıwǵa eristi. Búgin elimizde jaslarǵa berilip atırǵan imkaniyatlar, jaratılǵan sharayatlar Hurlimanǵa da úlken kúsh, motivaciya bermekte. AQShtıń abıraylı universitetinde bilim alıw, múddetinen aldın student bolıw bul óz-ózinen bolmaydı. Bunıń artında qanshadan-qansha tınımsız miynet, oqıw, izleniw, háreket bar. Mektebimizde talantlı oqıwshılarımız júdá kóp. Oylayman, keleshekte ele oqıwshılarımızǵa bar bilimimizdi bere alsaq, til úyreniw, bilimlerin arttırıwǵa qızıqtırsaq Hurliman sıyaqlı oqıwshılarımızdıń qatarı jáne de kóbeedi.

Álbette, elimizde jaslar isbilermenligin rawajlandırıw baǵdarında keń kólemli jumıslar ámelge asırılıp atırǵan búgingi kúnde Hurlimanniń sırt ellerdiń tájiriybesi tiykarında biznes marketing hám psixologiya qánigeligi baǵdarında bilim alıwı keleshekte óz nátiyjesin beredi.

– Bul universitet 1842-jılı shólkemlestirilgen bolıp, bul jerde 40 tan aslam baǵdarlarda studentler bilim aladı, – deydi Hurliman Qalibaeva. – Itibarlısı, bul jerde 13-16 jastaǵı qızlar ushın bakalavriat baǵdarında oqıw imkaniyatı bar. Men tiykarınan, biznes marketing hám psixologiya baǵdarına itibar berdim. Keleshekte oqıwdı tabıslı tamamlap, elimizde usı tarawda oqıw orayları, mektepler ashıw nietindemen. Eki jıl aldın, yaǵnıy, 7-klasstı pitkergen waqtımda Amerikadaǵı 20 dan aslam joqarı bilimlendiriw mákemelerine hújjet tapsırdım. Biraq jasım kelispegenlikten, biykar juwaptı alar edim. Biraq, 2025-jıldıń fevral ayında 80 mıń dollarǵa shamalas grant utıp aldım. Soń hújjetlerimdi toltırıp, 2026-jılı 100 procentli grant iesi boldım.

Bul jerde oqıw ózinshe juwapkershilikli. Atap aytqanda, xalıqaralıq imtixanlardan joqarı ball alıw, professor-oqıtıwshılar menen óz baǵdarımızda hár qıylı joybarlar, ilimiy jumıslar ústinde islew, jańa ideyalardı ámeliyatqa engiziw talap etiledi. Házirgi waqıtta mámleketimizdiń abıraylı kompaniyasında oqıwshılarǵa inglis tili boyınsha, yaǵnıy xalıqaralıq imtixanlarǵa hújjet tapsırıw baǵdarında jumıs alıp barıp atırman. Eki oqıwshım Italiya hám YAponiyadaǵı universitettiń 100 procent grant jeńimpazı bolıp, oqıw ushın jónep ketti. 6 adam Vetnam mámleketine óz tájiriybesin arttırıw ushın barmaqta. Itibarlısı, oqıwshılarım Top 100 liktegi joqarı oqıw orınlarınıń professor-oqıtıwshıları menen ilimiy jumıslar alıp barmaqta.

Álbette, Hurlimanniń bunday jetiskenlikleri tiykarında shańaraqtaǵı ortalıq, ásirese, ata-anasınıń qollap-quwatlawı áhmietli orın iyeleydi.

– Hurliman balalıǵınan oǵada umtılıwshań qız edi, – deydi anası Ziyora Jumaniyazova. – Ondaǵı shet tiline bolǵan qızıǵıwshılıqtı kórip, zárúr imkaniyatlardı jaratıp beriwge háreket ettik. Hurliman shańaraǵımızda úlken perzent. Ol mine usı alǵan bilimleri, óziniń ádebi, minez-qulqı, erisip atırǵan nátiyjeleri menen de úkelerine órnek bolmaqta. Ol ózi menen qalmastan doslarına, klaslaslarına da bilgenlerin úyretiwdi qoyǵan joq. Házirgi waqıtta oqıwshıları sırt ellerdiń joqarı oqıw orınlarında bilim almaqta. Bul ata-ana ushın úlken maqtanısh. Biz bunnan álbette maqtanamız.

Awa, elimizde jaslarǵa qaratılıp atırǵan itibar sebepli Hurliman sıyaqlı qábiletli hám bilimli jaslardıń qatarı kóbeyip baradı.

F.ABDURAIMOVA.