Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında pitkeriwshi basqısh studentlerine diplom tapsırıwǵa baǵıshlanǵan “Jarqın keleshek, joqarı párwaz sizge, áziz pitkeriwshi” súreni astında saltanatlı ilaj bolıp ótti.
Jaslardı hár tárepleme qollap-quwatlaw, olardıń zamanagóy bilim hám básekige shıdamlı kásip ielewi jáne miynet bazarında múnásip orın tabıwına qaratılǵan mámleketlik siyasattıń ámeliy kórinisi bolǵan bul ilaj kóterińki ruwxta shólkemlestirildi. Onda respublikamızdaǵı joqarı oqıw orınlarınıń basshıları, filial professor-oqıtıwshıları, jámiechilik wákilleri hám pitkeriwshi student-jaslar qatnastı.
Ilajda Qaraqalpaqstan Respublikası Joqarǵı Keńesiniń Sociallıq-mádeniy rawajlanıw, jaslar siyasatı hám jámietlik birlespeler máseleleri komitetiniń baslıǵı M.Atamuratov, Qaraqalpaqstan Respublikası veterinariya hám sharwashılıqtı rawajlandırıw komitetiniń baslıǵı M.Qaypanov, filial direktorı, professor A.Esimbetov shıǵıp sóylep, elimizde bilimlendiriw tarawında ámelge asırılıp atırǵan reformalar, joqarı bilimlendiriwdiń sapasın arttırıw, xalıqaralıq birge islesiwdi keńeytiw hám maman qánigeler tayarlaw baǵdarında ámelge asırılıp atırǵan jumıslarǵa ayrıqsha toqtap ótti.
Sonday-aq, jas qánigelerdiń mámleket rawajlanıwındaǵı ornı barǵan sayın artıp atırǵanı atap ótildi.
Ilajda bakalavriat, magistratura hám sırtqı tálim baǵdarın tabıslı tamamlaǵan pitkeriwshilerge mámleketlik úlgidegi diplomlar saltanatlı túrde tapsırıldı.
Maǵlıwmat ornında, bıyılǵı oqıw jılında filialdı tiyisli baǵdarlar boyınsha jámi 208 jas pitkermekte. Sonnan 184 i bakalavriat, 24 i magistratura, 71 i sırtqı bilimlendiriw baǵdarına tuwra keledi. Pitkeriwshilerdiń miynet bazarında múnásip orın ielewin támiyinlew boyınsha ámelge asırılıp atırǵan jumıslar nátiyjesinde 188 pitkeriwshiniń bántligi boyınsha hújjetler rásmiylestirilgen.
Ilaj jaslardıń student sıpatındaǵı turmısına juwmaq jasap, olardıń elimizdiń rawajlanıwı jolındaǵı kásiplik jumısına bekkem tiykar jarattı. Endi olar óz bilimi hám miyneti menen jámiettiń rawajlanıwına múnásip xızmet etetuǵın qánigeler qatarına qosıladı.
D.ABIBULLAEV.
