Mámleketimizde hár jılı 30-iyul – Xalıqlar doslıǵı kúni sıpatında keńnen belgilenedi. Itibarlısı, bul sáne elimizdegi túrli millet wákilleriniń bir-birine bolǵan miyrim-shápááti, awızbirshiligi hám tatıwlıǵın jáne de joqarılatıwǵa xızmet etedi.

Xojeli rayonında 30-iyul – Xalıqlar doslıǵı kúni múnásibeti menen “Doslıq festivalı” sheńberinde Gala koncert baǵdarlaması kóterińki ruwxta bolıp ótti.

Atap ótilgenindey, búgingi kúnde milliy mádeniy oraylardıń materiallıq-texnikalıq bazasın jaqsılaw, zamanagóy texnikalıq úskeneler menen támiyinlew, jumıs nátiyjeliligin arttırıw baǵdarında unamlı nátiyjelerge erisilmekte.

Sonday-aq, xalıqlar doslıǵı festivalları sheńberinde ótkerilip atırǵan dógerek sáwbetleri, dóretiwshilik sóylesiwler, kitap kórgizbeleri hám usı sıyaqlı mádeniy-aǵartıwshılıq ilajlardıń áhmieti barǵan sayın artıp barmaqta.

– Kóp milletli xalqımız mámleketimizdegi huqıq hám imkaniyatlardan paydalanıp, ekonomikanıń túrli tarmaqlarında Watanımızdıń rawajlanıwına óz úlesin qosıp kelmekte, – deydi Respublikalıq Ruwxıy-aǵartıwshılıq orayı Xojeli rayonlıq bóliminiń baslıǵı Abat Jienbaev. – Búgingi kúnde Xojeli rayonında 131700 xalıq jasaydı. Itibarlısı, túrli millet wákilleri jasaytuǵın rayonımızda adamlarımızdıń jasaw sharayatları, úrp-ádetleri, bir-birine bolǵan mehir-múriwbetleri álle qashan doslıq, tatıwlıq baylanısları menen baylanısıp ketken.

Sáne múnásibeti menen ótkerilip atırǵan bul bayram ilajı da áyne xalqımızdıń kewlindegi arzıw-maqsetlerdi sáwlelendiredi. Bunday ilajlar xalıqlar arasındaǵı doslıq, tatıwlıq hám keńpeyillik qádiriyatların kórsetedi.

Saltanatlı keshede doslıqtı jırlaytuǵın nama-qosıqlar hám ayaq oyınlar atqarıldı.

Haqıyqatında da, elimiz boylap ótkerilip atırǵan Doslıq festivalları álbette, xalqımızdı jáne de birlestirip, tınıshlıq-tatıwlıq, milletleraralıq tatıwlıq hám diniy keńpeyillik ortalıǵın bekkemlewge xızmet etedi.

F.NURULLAEVA.