Búgingi kúnde elimizde sociallıq járdemge mútáj shaxslarǵa járdem beriw, olardıń jámiyetlik turmısta tolıq qatnasıwın támiyinlew, bul baǵdarda jańa sociallıq xızmetlerdi engiziw maqsetinde izbe-iz jumıslar ámelge asırılmaqta.

Usı maqsette paytaxtımız Nókis qalasında “Jańa kún” kúndizgi qarawıl xızmeti jumısı jolǵa qoyıldı.

Respublikamızda birinshi márte óz jumısın baslaǵan bul oray búgin haqıyqıy mehir hám itibar orayı sıpatında tán alınbaqta.

– Búgingi kúnde elimizde járdemge mútáj shaxslarǵa qaratılıp atırǵan itibar hám ǵamqorlıq, olardı sociallıq qollap-quwatlaw, bul baǵdardaǵı jumıslardı bunnan bılay da jetilistiriw, shańaraqlıq ortalıqqa jaqın túrdegi jańa xızmet túrleriniń shólkemlestiriliwi álbette mámleketimizdiń tiykarǵı baǵdarlarınan biri, – deydi “YAngi kun” kúndizgi qaraw xızmeti basshısı Gulmira Kallibekova. – Bul oray Prezidentimizdiń 2026-jıl 27-apreldegi “Ruwxıy jaǵdayı buzılǵan mayıplıǵı bolǵan shaxslarǵa sociallıq xızmet kórsetiw sistemasın túp-tiykarınan jetilistiriw boyınsha qosımsha ilajlar haqqında”ǵı PP-69-sanlı pármanınıń orınlanıwın támiyinlew maqsetinde shólkemlestirildi. Bul jerde járdemge mútáj shaxslar kún dawamında qarawǵa alınadı. Itibarlı tárepi, orayımızda barlıq sharayat hám qolaylıqlar jaratılǵan bolıp, shınıǵıw bólmesi, jataqxana, asxana, dem alıw bólmesi bar. Sonday-aq, olardıń waqtın mazmunlı ótkeriw, hár biri menen individual islew, qızıǵıwshılıqlarına qarap hár qıylı dógereklerge tartıw, atap aytqanda, súwret salıw, muzıka, aqılıy rawajlanıwına járdem beretuǵın hár qıylı oyınlar shólkemlestirilgen.

Bul jerde házirgi waqıtta 5 shaxs usı xızmetten paydalanbaqta.

– Bul oraydıń ashılǵanın esitip, inimdi alıp keldim, – deydi Guljahan Áwezmuratova. – Burınları oǵan ózim úyde qaraytuǵın edim. Bul jerdegi sharayatlardı kórip quwandım. Endi ózim de jumısqa shıǵıw nietindemen. Elimizde mayıplıǵı bolǵan shaxslarǵa itibar qaratılıp, mine, usınday sharayatlarǵa ie oraydıń jumıs baslawı men sıyaqlı analar, apa-qarındaslarımız ushın oǵada úlken járdem boldı, dep oylayman.

Haqıyqatında da, elimizde mayıplıǵı bolǵan, járdemge mútáj shaxslarǵa qaratılıp atırǵan bunday itibar hám ǵamqorlıqlar adamgershiliktiń ayqın úlgisi bolıp esaplanadı.

F.NURULLAEVA.