Nókis qalasında Ózbekstan Milliy bankiniń “Keleshekke qádem” baǵdarlaması sheńberinde “Talaba Expo – 2026” kásipler kórgizbesi bolıp ótti.

Ilaj Qaraqalpaqstan Respublikası Joqarǵı Keńesi, “Ózmilliybank” AJ, Ózbekstan Respublikası Joqarı bilimlendiriw, ilim hám innovaciyalar ministrligi, Sawda-sanaat palatası, Jaslar isleri agentligi hám Kámbaǵallıqtı qısqartıw hám bántlik ministrligi menen birgelikte shólkemlestirildi.

Kórgizbeniń ashılıw máresiminde Qaraqalpaqstan Respublikası Joqarǵı Keńesiniń Baslıǵı Amanbay Orınbaev hám “Ózmilliybank” AJnıń “Keleshekke qádem” orayınıń direktorı Elmurat Hoshimov shıǵıp sóylep, pitkeriwshilerdiń bántligin támiyinlew, olardıń kásiplik baǵdarın belgilew hám biznes baslamaların qollap-quwatlawda bul joybardıń áhmietine toqtap ótti.

Kórgizbe sheńberinde elimizde jumıs alıp barıp atırǵan kárxana hám shólkemlerdiń bir yarım mıńnan aslam bos jumıs orınları usınıs etildi. Sonday-aq, ózin-ózi bánt etiw hám biznes jumısın jolǵa qoyıw ushın 100 ge shamalas túrli ásbap-úskeneler, jeńilletilgen kredit paketleri usınıs etildi.

Eń áhmietlisi, kórgizbe kóplegen pitkeriwshiler ushın miynet jolına birinshi qádem qoyıw imkaniyatın jarattı. Mine, usınday jaslardıń biri – Nókis mámleketlik texnika universitetiniń pitkeriwshisi Aynura Baltabaeva boldı.

– Studentlik dáwirinde alǵan teoriyalıq bilimlerimdi ámeliyat procesinde bekkemlewge háreket ettim. Ámeliyat ótegen bilimlendiriw mákemesi miynetimdi múnásip bahalap, búgingi kórgizbede universitet hám jumıs beriwshi arasında úsh tárepleme shártnamaǵa qol qoyıldı. Bul men ushın úlken isenim hám juwapkershilik bolıp esaplanadı. Eń áhmietlisi, “Talaba Expo – 2026” sıyaqlı baslamalar pitkeriwshilerge diplom alǵannan keyin jumıs izlep sergizdan bolmastan, óz qánigeligi boyınsha miynet jolın baslaw imkaniyatın jaratpaqta. Bunday ilajlar jaslardıń bántligin támiyinlew, olardıń kásiplik potencialın júzege shıǵarıw hám keleshekke isenim menen qádem taslawında úlken áhmietke ie,-deydi Aynura Baltabaeva.

Itibarlı tárepi, “Talaba Expo – 2026” kásipler kórgizbesi sheńberinde bilimlendiriw mákemesi, universitet hám pitkeriwshi arasında úsh tárepleme shártnamaǵa qol qoyılıp, Aynura Baltabaeva miynet shártnaması tiykarında turaqlı jumısqa qabıl etildi.

Ilaj sońında “Keleshekke qádem” baǵdarlaması sheńberinde jeńilletilgen kredit alıp, isbilermenlik jumısın baslap atırǵan bir topar pitkeriwshi studentlerge vaucherler tapsırıldı. Sonday-aq, joqarı oqıw orınlarınıń belsendi student-jasları hám kórgizbeni joqarı dárejede shólkemlestiriwge úles qosqan kárxana, shólkem hám joqarı oqıw orınları alǵısnama hám estelik sawǵaları menen sıylıqlandı.

“Talaba Expo – 2026” tek ǵana bos jumıs orınları yarmarkası emes, al bilimlendiriw, jumıs beriwshiler hám qarjı institutları arasındaǵı nátiyjeli birge islesiwdiń ámeliy úlgisi sıpatında jaslardıń bántligin támiyinlewge xızmet etip atırǵan áhmietli maydan ekenin jáne bir márte kórsetti.

Ǵ.OTAJANOV.