Mámleketimizde isbilermenlik jumısın bunnan bılay da keńeytiw, qolaylı investiciyalıq ortalıqtı qáliplestiriw, jańa jumıs orınların jaratıw hám xalıqtıń abadanlıǵın támiyinlew baǵdarında keń kólemli ilajlar ámelge asırılmaqta. Ǵárezsizligimizdiń 35 jıllıq bayramı qarsańında Xojeli rayonında jańadan qurılıp paydalanıwǵa tapsırılǵan “ATBASAR” sawda kompleksi de mine usınday reformalardıń ámeliy kórinisi boldı. Komplekstiń saltanatlı ashılıw máresiminde rayon hákimi J.Ermashev, keń jámiechilik hám ǵalaba xabar qurallarınıń wákilleri qatnastı.
Atap ótilgenindey, sońǵı jılları elimizdiń barlıq aymaqları sıyaqlı Xojeli rayonında da keń kólemli reformalar ámelge asırılmaqta.
Ásirese, jańadan qurılıp atırǵan kóp qabatlı turaq jaylar, sawda kompleksleri, sociallıq obektler, jol qurılısı tarawında alıp barılıp atırǵan ilajlar xalıqtıń abadanlıǵına xızmet etpekte. Bul sawda kompleksi de aymaqtıń sociallıq-ekonomikalıq potencialın arttırıw, xızmet kórsetiw kólemin jáne de keńeytiw, xalıqqa qolaylı sharayat jaratıw menen birge jańa jumıs orınların shólkemlestiriwde úlken áhmietke ie.
Prezidentimizdiń tiyisli pármanında belgilengen imkaniyatlardan paydalanıp shólkemlestirilgen bul sawda kompleksi jas isbilermen, “CAPTAIN INVEST GROUP” JShJ basshısı YU.Karimovtıń baslaması menen iske qosıldı.
Ulıwma bahası 15 milliard sum qarjı esabınan boy tiklegen bul komplekste 32 sawda hám xızmet kórsetiw shaqapshası qurıldı hám nátiyjede 100 ge shamalas jańa jumıs orınları jaratıldı.
– Bul sawda kompleksiniń ǵárezsizligimizdiń 35 jıllıq bayramı qarsańında iske qosılıp atırǵanı biykarǵa emes. Rayonımızda mine usınday ózgerisler, rawajlanıwlar júz berip atırǵanı, álbette, xalıqtıń bántligin támiyinlewde áhmietli. Ashılıw máresimine kelip buǵan ózimiz gúwa bolmaqtamız. Xalqımız oǵada quwanıshlı. Hámmede bayram keypiyatı, bayram keypiyatı. Bunıń ushın mámleketimiz basshısına minnetdarshılıq bildiremiz, – deydi Guljan Ziyuatdinova.
Qatnasıwshılar bul jerde jaratılǵan qolaylıqlar menen jaqınnan tanıstı. Ilaj elimizdiń xosh hawaz qosıqshılarınıń qatnasıwındaǵı koncert baǵdarlaması menen dawam etti.
F.NURULLAEVA.
