Ўзбекистон Республикаси Президенти Ш.Мирзиёев раислигида шу йилнинг  21 сентябрь куни ўсимликлар карантини соҳасидаги ислоҳотлар натижадорлиги таҳлилига бағишланган йиғилиш ўтказилиб, экспортга кўмаклашиш, хорижий давлатлар билан битимлар тузиш, ўсимликлар клиникаси ва биолабораториялар ташкил қилиш шунингдек, маҳсулот етиштирувчи, қадоқловчи ва экспорт қилувчи ҳар бир корхонага карантин инспекторларини бириктириш, “даладан экспортгача” тамойили асосида тўлиқ фаолиятни таъминлаш борасида вазифалар белгилаб берилган эди.

Қорақалпоғистон Республикаси ўсимликлар карантини ҳудудий инспекцияси томонидан бу борада самарали ишлар амалга оширилмоқда. Яқинда Нукус туманидаги “Биогумус” фермер хўжалиги томонидан 17 тонна 920 килограмм қуритилган помидор маҳсулоти Франция давлатига экспортга жўнатилишидан олдин агроном-инспекторлар томонидан карантин назоратидан ва инспекция лабораториясида назоратдан ўтказилди.

— Мазкур маҳсулотларда зарарли организмлар аниқланмади, — дейди инспекциянинг етакчи агроном-фитопотологи С.Мадреймова. — Асосан, бу маҳсулотда помидор куяси зараркунандаси учраши мумкин. Бу зараркунанда помидорни етиштириш ва қуритиш жараёнида пайдо бўлади. Шу боис, маҳсулотлар лаборатория назоратидан ўтказилиб, экспортга жўнатилади.

Қ.Х.А.