Janajan Watanımızǵa múbárek Ramazan ayı kirip keldi. Ásirler dawamında musılmanlar tárepinen ayrıqsha húrmet penen kútip alınatuǵın bul múbárek ay kewiller tazaratuǵın, miyrim-shápáát hám saqawat sezimleri joqarılatuǵın ullı áyyyam bolıp esaplanadı. Elimizde tınıshlıq-tatıwlıqta oraza tutıw hám ibadat etiw imkaniyatı jaratılǵanı shúkirshilikke ılayıq. Ramazan ayında Quranı kárim túsirilgeni bul aydıń pazıyletlerin jáne de ullı etedi. Sonıń ushın bul ay tek ǵana oraza tutıw emes, al ruwxıy jetiklikke umtılıw, sabır-taqattı bekkemlew, iygilikli ámellerdi kóbeytiw dáwiri bolıp esaplanadı. Oraza insandı shúkirshilikke, mútájlerdiń jaǵdayın ańlawǵa, keńpeyillik hám awızbirshilikke shaqıradı. Payǵambarımız Muxammed sallallahu alayhi wasallam Ramazan ayında iyman hám sawap úmiti menen oraza tutqan móminlerdiń gúnaları keshiriliwin xabar bergen. Ol bul ayda jáne de saqawatlı bolıp, mútájlerge járdem beriwge ayrıqsha itibar qaratqan. Búgin de elimizde bul iygilikli dástúrler dawam ettirilip, tuwısqan-tuwısqanlar, qońsılar hám járdemge mútáj shańaraqlardıń halınan xabar alıw, saqawat hám qayırqomlıq ilajların ámelge asırıw keńnen en jaymaqta. 2026-jıl 16-fevralda mámleketimiz basshısı tárepinen “Múbárek Ramazan ayın múnásip túrde ótkeriw haqqında”ǵı qarar qabıl etildi. Qararǵa muwapıq, Qaraqalpaqstan Respublikası Ministrler Keńesi, Din isleri boyınsha komitet, Ózbekstan máhálleleri awqamı, Sociallıq qorǵaw milliy agentligi, “Nuranıy” qorı hám basqa da birge islesiwshi shólkemler menen birgelikte Ramazan ayın milliy dástúr hám qádiriyatlarımızǵa say tárizde ótkeriw boyınsha keń kólemli ilajlar ámelge asırılmaqta. Sonıń ishinde, Qaraqalpaqstanda da “Ramazan – miyrim-shápáát, awızbirshilik hám shúkirshilik ayı” ideyası tiykarında járdemge mútáj shańaraqlardı qollap-quwatlaw, kekseler hám mayıplıǵı bolǵan shaxslarǵa ámeliy járdem kórsetiw, iftar ilajların ápiwayı hám tártipli ótkeriwge ayrıqsha itibar qaratılmaqta. Sawda hám xızmet kórsetiw tarawlarında arzanlastırılǵan yarmarkalar shólkemlestirilip, xalıqqa qolaylıqlar jaratılmaqta. Sonday-aq, zakat, fitr hám fidya muǵdarları rásmiy túrde belgilenip, musılmanlarǵa ibadatların orınlawda anıqlıq hám jeńillik jaratıldı. Meshitlerde tarawih namazları hám Quran xatmları orınlanbaqta. Bul háreketler jámiette awızbirshilik, keńpeyillik hám insan qádirin ulıǵlaw ideyaların bekkemlewge xızmet etpekte. Ramazan – duwalar qabıl bolatuǵın ay. Usı múbárek kúnlerde Watanımız tınısh, xalqımız abadan, shańaraqlarımız baxıt-ıǵbal hám jaslarımızdıń kamalǵa keliwi joqarı bolıwın Alla taaladan soraymız! Allah taala bárshemizge Ramazan ayın múbárek etsin. Bul aydan únemli paydalanıp, sawaplarımızdı kóbeytiw, gúnalarımızǵa táwbe etiwge tuwısqan bolsın, bul múbárek ayda gúnalardan pákleniwdi nesip etsin! Awmiyin! Aybek DJULAUShIEV, Qaraqalpaqstan musılmanları qazıyatı qazısınıń orınbasarı, Nókis qalası Shayx Muhammed Sadıq Muhammed YUsuf jome meshiti imam-xatibi.