Ádillik – jámiyet turaqlılıǵınıń bekkem tiykarı. Onıń bekkemligi bolsa nızam ústinligine sadıqlıq penen xızmet etip atırǵan pidayı insanlar, ásirese, óziniń mártligi, bilimi hám ádilligi menen joqarı juwapkershilikti moynına alǵan sudyalardıń jumısına tikkeley baylanıslı. Ásirese, bul maqtanıshlı kásipte jumıs alıp barıp atırǵan hayal sudyalardıń úlesi sońǵı jıllarda barǵan sayın joqarı itibarǵa ie bolmaqta.

Bıyılǵı Xalıqaralıq hayal-qızlar bayramı aldınan Ózbekstan Respublikası Prezidentiniń “10-mart – Xalıqaralıq hayal sudyalar kúni múnásibeti menen sıylıqlaw haqqında”ǵı pármanı tiykarında tarawda ámelge asırılıp atırǵan reformalardı tereńlestiriw, ádil sudlawdı ádillik, qalıslıq hám ashıq-aydınlıq principleri tiykarında ámelge asırıw arqalı puqaralardıń nızamlı huqıqları menen máplerin qorǵawǵa múnásip úles qosqan bir topar hayal sudyalar mámleketimizdiń joqarı orden hám medalları menen sıylıqlandı.

Usı párman menen Qaraqalpaqstan Respublikası sudınıń ekonomikalıq isler boyınsha sudyası Gulistan Eshnazarova “Jasorat,” Qaraqalpaqstan Respublikası hákimshilik sudınıń sudyası Janat Aymaganbetova “Shuhrat” medalı menen sıylıqlanǵanı mámleketimiz basshısınıń qaraqalpaqstanlı sudya hayal-qızlarǵa kórsetken itibarı hám olardıń sud sistemasındaǵı pidayı miynetleriniń múnásip tán alınıwı boldı.

“Jasorat” medalınıń iesi Gúlistan Eshnazarova jumısı dawamında sud korpusınıń abırayın arttırıw, ekonomikalıq qatnasıqlarda nızamlılıqtı támiyinlew hám isbilermenlik subektleriniń huqıqları menen máplerin qorǵaw baǵdarında salmaqlı jumıslardı ámelge asırıp kelmekte.

Sudya bolıw bul – tereń bilim, qalıslıq hám principiallıqtı talap etedi, – deydi Gulistan Eshnazarova. – Sudya ushın eń úlken juwapkershilik – hár bir istiń táǵdiri artında insan táǵdiri turǵanın ańlap qarar qabıl etiw bolıp esaplanadı. Ádillikti támiyinlew – bul tek ǵana nızamdı qollanıw emes, al insan huqıqları menen máplerin qorǵaw degeni.

Sonıń ishinde, 2023-2025-jıllar dawamında ol birinshi instanciya tártibinde 13 ekonomikalıq isti kórip shıǵadı. Sonday-aq, apellyaciya, kassaciya hám tekseriw tártibinde bayanat etken ekonomikalıq jumısları 210 dı, basshılıq etken jumısları bolsa 246 dı quradı. Bul sanlar sudyanıń belsendiligi hám jumısqa bolǵan juwapkershilikli qatnasın ayqın kórsetedi.

Sońǵı jılları ol sud ámeliyatı boyınsha 7 ulıwmalastırıw jumıslarında tikkeley qatnastı. Bunday analitikalıq jumıslar sud ámeliyatındaǵı bar mashqalalardı anıqlaw hám olardı saplastırıwda ayrıqsha áhmietke ie.

Sudyanıń hár bir qararı tek ǵana belgili bir istiń táǵdirine emes, al jámiette ádillikke bolǵan isenimge de tásir etedi.

Búgin mámleketimizde hayal-qızlardıń mámleketlik hám jámietlik turmıstaǵı ornı barǵan sayın bekkemlenip barmaqta. Sud sistemasında jumıs alıp barıp atırǵan hayal sudyalar bolsa óziniń bilim hám potencialı, principiallıǵı hám ádilligi menen bul tarawda da joqarı nátiyjelerge erisiw múmkin ekenligin ámelde kórsetpekte.

Gúlistan Eshnazarova sıyaqlı pidayı sudyalardıń jumısı sonı kórsetedi, ádillik jolında xızmet etiw – bul tek ǵana kásip emes, al joqarı juwapkershilik, mártlik hám pidayılıqtı talap etetuǵın turmıslıq wazıypa bolıp esaplanadı.

Gulayım ǴANIYEVA,

Qaraqalpaqstan Respublikası sudınıń jámiechilik hám ǵalaba xabar quralları menen baylanıslar boyınsha bas konsultantı.