Hayal-qız ázelden miyrim-shápáát, sabır-taqat hám gózzallıq tımsalı sıpatında qádirlenip kelgen. Jámiyette hayal-qızlarǵa bolǵan húrmet hám itibar bolsa ruwxıy jetikliktiń áhmietli ólshemlerinen biri bolıp esaplanadı. Usı mániste, hár jılı 8-mart – Xalıqaralıq hayal-qızlar kúni keńnen belgilenip, hayal-qızlardıń shańaraq hám jámietlik turmıstaǵı ornı ayrıqsha tán alınadı.

Usı sáne múnásibeti menen Ózbekstan kásiplik awqamları Federaciyası Qaraqalpaqstan keńesi tárepinen hayal-qızlarǵa baǵıshlanǵan bayram ilajı ótkerildi. Onda túrli taraw wákilleri, belsendi hám intaker hayal-qızlar hám kásiplik awqamınıń veteranları qatnastı.

Ilajda shıǵıp sóylegen Ózbekstan kásiplik awqamları Federaciyası Qaraqalpaqstan keńesiniń baslıǵı Uluǵbek Jalmenov, sonday-aq, Energetika, neft-gaz hám geologiya xızmetkerleri kásiplik awqamı Respublikalıq keńesi baslıǵınıń orınbasarı Saidmurod Twxtaev, apparatınıń miynet huqıq inspektorı Jamshid Qodirovlar elimizde hayal-qızlardı hár tárepleme qollap-quwatlaw, olardıń miynet etiwin xoshametlew hám jámietlik turmısta belsene qatnasıwın támiyinlew baǵdarında ámelge asırılıp atırǵan keń kólemli reformalarǵa toqtap ótti.

Atap ótilgenindey, hayal qádirlengen jámiette miyrim-shápáát, bereket hám rawajlanıw turaqlı boladı.

Ilaj dawamında miyneti hám intakerligi menen úlgi bolıp atırǵan bir topar taraw wákilleri Federaciya tárepinen minnetdarshılıq xatı hám estelik sawǵaları menen sıylıqlandı.

– Derlik 30 jıldan aslam Nókis transport texnikumında oqıtıwshı sıpatında jumıs alıp baraman. Hayaldı qádirlew – bul, bárinen burın, anaǵa hám shańaraqqa bolǵan húrmet, – dedi texnikumnıń baslanǵısh kásiplik awqamı shólkeminiń baslıǵı Anjim Jusupova.

Bozataw rayonınan kelgen Urumxan Tájimuratova da sıylıqlanǵanın qanaatlanıwshılıq penen tilge alıp, hayal-qızlarǵa bolǵan húrmet hám itibar bárqulla joqarı qádiriyat sıpatında qádirlenip kiyatırǵanın atap ótti. Shımbaylı muǵallim Sarvinaz Davekeeva bolsa bunday ilajlar hayal-qızlardıń kewlinde quwanısh oyatıp, olardı jańa jetiskenliklerge qaray ruwxlandıratuǵının atap ótti.

F.ABDURAIMOVA.