Emlewxana – bul tek ǵana medicina mákemesi emes, al insan ómiri ushın gúres bolıp ótetuǵın juwapkershilikli orın. Bul jerde hár bir minut, hár bir háreket hám hár bir procedura úlken áhmiyetke iye.

Respublikalıq balalar juqpalı kesellikler emlewxanasınıń úlken jastaǵılar bóliminiń aǵa miyirbiykesi sıpatında men kúndelikli jumısımda tek ǵana hákimshilik jumıslar menen shuǵıllanbay, al nawqaslardıń nátiyjeli emleniwi ushın zárúr tártip hám muwapıqlasıwdı támiyinlewge de háreket etemen.

Jumıs kúnimiz bólimdegi orta hám kishi medicina xızmetkerleriniń jumısın shólkemlestiriwden baslanadı. Juqpalı kesellikler bóliminde sanitariyalıq-epidemiologiyalıq rejimge qatań ámel etiw eń áhmietli talaplardan esaplanadı. Nawqaslardıń kútimi, dári-dármaqlardı óz waqtında hám durıs bólistiriw, shıpakerler tárepinen belgilengen emlewlerdiń sapalı orınlanıwın qadaǵalaw – turaqlı itibarımızda. Sonıń menen birge, medicina xızmetkerleriniń qáwipsizligin támiyinlew, jeke qorǵanıw qurallarınan durıs paydalanıw boyınsha kórsetpelerge ámel etiliwi de qadaǵalanadı.

Búgingi kúnde densawlıqtı saqlaw tarawında alıp barılıp atırǵan sanlastırıw procesi jumısımızdı sezilerli dárejede jeńillestirdi. Burın kóp waqıt talap etken qaǵaz hújjetlerdiń ornın elektron sistemalar ielemekte. Bul arqalı nawqaslar haqqındaǵı maǵlıwmatlardı júrgiziw, dári qurallarınıń qaldıǵın qadaǵalaw hám hár qıylı esabatlardı tayarlaw bir qansha nátiyjeli boldı. Sanlastırıw waqıttı únemlew menen birge, medicinalıq qátelerdiń aldın alıwda da úlken áhmietke ie bolmaqta.

Biziń jámáát – bir maqset jolında birlesken tatıw jámáát. Úlken miyirbiyke sıpatında jas kadrlarǵa ustazlıq etiw, olarǵa juqpalı kesellikler menen islesiwdiń ózine tán táreplerin úyretiw, qıyın jaǵdaylarda olardı ruwxıy qollap-quwatlawǵa ayrıqsha itibar qaratıladı. Nawqaslardıń sawalıp ketiwin kóriw, olardıń kózlerindegi minnetdarshılıqtı seziw – kásibimizdiń eń úlken jetiskenligi.

Emlewxanamızda ámelge asırılıp atırǵan reformalar, materiallıq-texnikalıq bazanıń bekkemleniwi hám medicina xızmetkerleri ushın jaratılıp atırǵan sharayatlar jumısımızdıń nátiyjeliligin jáne de arttırmaqta. Biz ushın eń tiykarǵı maqset – xalıqtıń salamatlıǵı jolında shın kewilden xızmet etiw hám medicinalıq xızmettiń sapasın bunnan bılay da arttırıw bolıp tabıladı.

Dina XUDOYBERGENOVA,

Respublikalıq balalar juqpalı kesellikler emlewxanasınıń úlken miyirbiykesi.