Usı jıldıń 3-aprel kúni “Aq qus” kompleksinde “Media háptelik” ilajlarınıń juwmaǵına baǵıshlanǵan saltanatlı máresim bolıp ótti. Ilajda Ózbekstan Prezidenti Administraciyası janındaǵı Ǵalaba xabar quralları ushın kontent tayarlaw orayınıń direktorı Qobiljon Ahmedov shıǵıp sóylep, bul iri joybardıń Qaraqalpaqstannan baslanıp atırǵanı biykarǵa emes ekenligin atap ótti. Ol sońǵı jılları aymaqta ámelge asırılıp atırǵan keń kólemli dóretiwshilik jumısları hám jańalanıwlarǵa ayrıqsha toqtap ótti. Sonday-aq, bul iri media joybar jurnalistler, blogerler hám baspasóz xatkerleriniń mamanlıǵın arttırıw, tarawǵa qızıǵıwshı jaslardı zamanagóy milliy kontent tayarlawǵa úyretiwge qaratılǵanı atap ótildi. Ilajda Qaraqalpaqstan Respublikası Joqarǵı Keńesi apparatı málimleme xızmeti bóliminiń baslıǵı Azamat Ajimuratov shıǵıp sóylep, sońǵı jılları aymaqta ámelge asırılıp atırǵan keń kólemli reformalardı media tarawında sáwlelendiriw baǵdarında ámelge asırılǵan jumıslar boyınsha prezentaciya ótkerdi. Sonday-aq, ilajda qatnasqan jurnalistler hám jaslar óz tásirleri menen ortaqlasıp, bul joybar keleshektegi jumıslarında jáne de janlı hám sapalı kontent tayarlawda ayrıqsha áhmietke ie bolatuǵının atap ótti. – Media háptelik dawamında qatnasıwshılar ekonomikalıq tallaw, statistikalıq maǵlıwmatlar menen islesiw sıyaqlı bir qatar baǵdarlarda zamanagóy texnologiyalardan paydalanıw boyınsha tájiriybe arttırdı, – deydi “Qaraqalpaqstan jasları” gazetasınıń bas redaktorı Aruxan Turekeeva. – Sonday-aq, mámleketimizde ámelge asırılıp atırǵan reformalardı sáwlelendiriw, sociallıq tarmaqlarda operativ málimleme tarqatıw procesinde faktlerdi tekseriw kónlikpeleri boyınsha da ámeliy usınıslar berildi. Bul háptelik mámleketimiz tariyxında birinshi márte barlıq aymaqlardı qamtıp alǵan keń kólemli media-bilimlendiriw joybarı sıpatında ayrıqsha áhmietke ie bolmaqta. Onda zamanagóy texnologiyalar hám jasalma intellekt quralların ózlestiriwge ayrıqsha itibar qaratılǵanı qatnasıwshılarda úlken qızıǵıwshılıq oyattı. Ilaj dawamında zamanagóy málimleme mákanında úlken áhmietke ie bolıp atırǵan máseleler – sociallıq tarmaqlarda nátiyjeli islew, feyk málimlemelerge qarsı gúresiw hám jasalma intellekt imkaniyatlarınan paydalanıw sıyaqlı baǵdarlarǵa da úlken itibar qaratılǵanın ayrıqsha atap ótiw kerek. Ilaj qatnasıwshıları atap ótkenindey, “Media háptelik” tek ǵana teoriyalıq bilimlerdi arttırıw emes, al ámeliy kónlikpelerdi bekkemlew, tarawdaǵı áhmietli mashqalalardı dodalaw hám jańa sheshimler islep shıǵıw ushın áhmietli platforma bolıp xızmet etti. “Media háptelik” juwmaǵı: 230 dan aslam qatnasıwshıǵa sertifikat tapsırıldı Máresim juwmaǵında seminarlarda belsene qatnasqan 230 dan aslam tele, radio, gazeta jurnalistleri, blogerler hám media tarawı xızmetkerleri jáne jas qatnasıwshılarǵa sertifikatlar saltanatlı túrde tapsırıldı. Bul bolsa olardıń háreketleri hám belsendiliginiń múnásip tán alınıwı sıpatında ayrıqsha áhmietke ie boldı. Qaraqalpaqstanda ótkerilgen “Media háptelik” media tarawı wákilleri ushın tek ǵana bilim hám tájiriybe dáregi emes, al jańa ideyalar, nátiyjeli birge islesiw hám ilham maydanına aylandı. Kásipleslerimiz hám jaslardıń “Media háptelik”te alǵan bilimleri milliy kontent tayarlawǵa, onıń rawajlanıwı ushın áhmietli qádem boladı, dep isenemiz. Ǵ.Atajanov, Jurnalist.