Nókis qalasındaǵı “Suwshılar mektebi”nde Qaraqalpaqstan Respublikası Suw xojalıǵı ministrliginiń baslaması menen suw xojalıǵı tarawındaǵı startaplardı qollap-quwatlawǵa baǵıshlanǵan áhmiyetli ilaj bolıp ótti.

Ilajda irrigaciya hám melioraciya baǵdarında bilim alıp atırǵan studentler, magistrantlar, jas ilimpazlar hám suw xojalıǵı sisteması shólkemleriniń basshıları qatnastı.

Ilaj aldınan Qaraqalpaqstan Respublikası Suw xojalıǵı ministriniń birinshi orınbasarı A.Urazımbetov shıǵıp sóylep, Ózbekstan Respublikası Prezidentiniń 2026-jıl 11-fevraldaǵı “Startaplardı qollap-quwatlawdıń kompleksli ekosistemasın engiziw ilajları haqqında”ǵı qararınıń mazmun-mánisin túsindirip, belgilengen wazıypalarǵa toqtap ótti.

Ilaj dawamında Nókis qalasındaǵı “IT Park”tiń startaplardı rawajlandırıw bóliminiń bas menedjeri R.Kosnazarov, “Agrobank” AKB bólim baslıǵı N.Otegenov hám de Irrigaciya hám suw mashqalaları ilimiy-izertlew institutı janındaǵı Qaraqalpaqstan regionallıq orayınıń direktorı S.Kurbanbaev shıǵıp sóylep, startaplardı islep shıǵıw procesi, sonday-aq, suw xojalıǵı tarawında ámelge asırılıp atırǵan innovaciyalıq joybarlar haqqında maǵlıwmat berdi.

Atap ótilgenindey, bul qararǵa muwapıq mámleketimizde startaplardı ideya basqıshınan baslap, olardı iske qosıw hám xalıqaralıq bazarǵa alıp shıǵıwǵa shekemgi tórt basqıshlı kompleksli ekosistema engizilmekte. Bul bolsa, ásirese, suw xojalıǵı sıyaqlı strategiyalıq áhmietke ie tarawda innovaciyalıq sheshimlerdi islep shıǵıw hám olardı ámeliyatqa engiziw ushın keń imkaniyatlar jaratadı.

Ilajda suw xojalıǵı baǵdarında óz startapların islep shıǵıp atırǵan jas ilimpazlar óz ideyaları boyınsha prezentaciyalardı ótkerdi hám ilimpazlar tárepinen usı startap ideyaları, tarawdaǵı bar mashqalalar hám olardıń sheshimleri dodalandı.

Sonıń menen birge, startaplar ústinde jumıs alıp barıp atırǵan jaslarǵa ámeliy járdem kórsetiw maqsetinde sistema shólkemleri biriktirildi.