Ózbekstan kásiplik awqamları Federaciyasınıń Qaraqalpaqstan keńesi baslaması menen Beruniy rayonında kásiplik awqamlarınıń jumısın bunnan bılay da jetilistiriw, sistemanıń nátiyjeliligin arttırıw hám xızmetkerler menen islesiw mádeniyatın arttırıwǵa qaratılǵan oqıw-seminarı shólkemlestirildi. Bul ilaj hár qıylı tarawlarda jumıs alıp barıp atırǵan shólkem hám mákemelerden 164 juwapker xızmetker hám kásiplik awqamlarınıń wákillerin bir jerge jámledi.

Ilajdı ótkeriwden tiykarǵı maqset – orınlarda kásiplik awqamlarınıń jumısın jańa basqıshqa alıp shıǵıw, xızmetkerlerdiń huqıqları menen máplerin qorǵaw sistemasın jáne de kúsheytiw, sonday-aq, miynet qatnasıqları tarawında júzege kelip atırǵan máselelerge nátiyjeli sheshim tabıw boyınsha ámeliy kónlikpelerdi arttırıwdan ibarat boldı.

Seminarda Ózbekstan kásiplik awqamları Federaciyası Qaraqalpaqstan keńesiniń shólkemlestiriw máseleleri boyınsha bólim baslıǵı Gulnara Ilmuradova shıǵıp sóylep, tarawda ámelge asırılıp atırǵan reformalar, sonday-aq, miynet nızamshılıǵındaǵı sońǵı jańalıqlar hám olardıń ámeldegi áhmieti haqqında tolıq maǵlıwmat berdi.

Ilaj dawamında kásiplik awqamlarınıń jumısın jáne de nátiyjeli shólkemlestiriw, jumısshı-xızmetkerlerdiń múrájatları menen islesiw sistemasın jetilistiriw, hújjet aylanısın optimallastırıw hám sociallıq sheriklik qatnasıqların bekkemlew sıyaqlı baǵdarlarda pikir alısıldı. Qatnasıwshılar ózleriniń ámeliy tájiriybeleri menen ortaqlasıp, sistemadaǵı bar mashqalalardı sheshiw boyınsha anıq usınıs hám baslamalardı alǵa qoydı.

Sonday-aq, seminar sheńberinde ashıq pikirlesiw ortalıǵı qáliplestirilip, qatnasıwshılar arasında soraw-juwaplar shólkemlestirildi.

Ilajdıń áhmietli bólegi kóshpeli qabıllaw shólkemlestirilgeni bolıp esaplanadı. Onda shólkem basshıları, kásiplik awqamlarınıń belsendileri hám jumısshı-xızmetkerler ózlerin qıynap atırǵan mashqala hám máseleler menen múrájat etiw imkaniyatına ie boldı. Qánigeler tárepinen hár bir múrájat itibarlı úyrenilip, bir qatar máseleler ornında sheshildi. Ayırım múrájatlar boyınsha bolsa huqıqıy túsinikler hám ámeliy usınıslar berildi.

Ulıwma alǵanda, bul ilaj kásiplik awqamları jumısınıń ashıq-aydınlıǵın támiyinlew, xızmetkerlerdiń huqıqıy sanası hám mádeniyatın arttırıw, olardıń sociallıq-ekonomikalıq máplerin isenimli qorǵaw jáne sistemanıń nátiyjeliligin jańa basqıshqa kóteriwge xızmet etti.

Fotima QALANDAROVA.