Shúkirshilik – insanǵa inam etilgen sheksiz jemislerdi ańlaw hám olardıń haqıyqıy qádirine jetiw. Ómir jolı sınaqlardan jıraq emes: onda quwanısh hám táshwish, abadanlıq hám qıyınshılıq birge júredi. Mine usınday túrli demlerde mómin adamnıń qálbine súenish, ruwxına mádet bolatuǵın eń ullı pazıylet – shúkirshilik bolıp esaplanadı.

Tınıshlıq, densawlıq, shańaraq tınıshlıǵı, perzentlerdiń kamalǵa keliwi, hadal ırısqı hám iyman tınıshlıǵı – hár bir sekundta qádirleniwi zárúr bolǵan biybaha baylıqlar bolıp esaplanadı. Ásirese, ashıq aspan hám tınısh jurt insanǵa erkin miynet etiw, ilim ielew, perzent tárbiyalaw hám iygilikli maqsetlerge umtılıw imkaniyatın beredi. Bul tınıshlıqtı saqlaw, shańaraqta miyrim-shápáátti bekkemlew hám jas áwladtı Watanǵa muhabbat ruwxında tárbiyalaw da shúkirshiliktiń eń gózzal kórinisi bolıp esaplanadı.

Shúkirshilik kewilge qánáát hám ruwxıy qáterjamlıq alıp kiredi. Ózgelerdiń qolındaǵıǵa kóz tigip nalımastan, ózindegi bar baylıqtı kóre biliw insandı ruwxıy jaqtan joqarılatadı. Mudamı densawlıǵımız, shańaraǵımız hám tınıshlıǵımız ushın alǵısta bolıw turmısımızǵa bereket hám payız baǵıshlaydı.

Shúkirshilik tek ǵana qurǵaq til ushındaǵı sózlerden ibarat emes – ol júrek sezimleri hám iygilikli ámellerde kórinedi. Berilgen mal-dúnyadan mútájlerge úlestiriw, ilimdi basqalar menen bólisiw, densawlıqtı qayırlı islerge jumsaw hám tınıshlıqtı kózdiń qarashıǵınday saqlaw shúkirshiliktiń haqıyqıy ámeliy kórinisi bolıp esaplanadı.

Almajan XUJANIYAZOVA,

Tórtkúl rayonı molla Jumabay jome meshiti imam-xatibiniń hayal-qızlar máseleleri boyınsha orınbasarı.