Men ushın da, máhállemiz xalqı ushın da 2026-jıldıń 18-sentyabr – umıtılmas kún boldı. Prezidentimiz Shavkat Mirziyoev penen birinshi márte júzbe-júz ushırasıp, sáwbetlestik. Kóp jıllardan berli mámleketimiz basshısın televideniye arqalı kórip, elimizdegi ózgerislerdi baqlap kelemiz. Búgin bolsa ol insannıń máhállemizge kelip, adamlar menen sáwbetleskenine gúwa boldıq. Prezidentimizdiń xalıq abadanlıǵı, jańa jumıs orınların jaratıw hám investiciya tartıw baǵdarındaǵı jumıslarınan xabardarmız. Jaqında Koreya Respublikasına saparı waqtında da mámleketimizdiń rawajlanıwı ushın áhmietli kelisimlerge erisilgeni haqqında sóz boldı. Ushırasıwda men ushın eń quwanıshlısı – ámelge asırılıp atırǵan jumıslardıń nátiyjesin óz máhállemiz mısalında kóriw boldı. Diyqan arna máhállesinde keyingi eki jılda “Kámbaǵallıqtan abadanlıqqa qaray” baǵdarlaması sheńberinde kanal hám salmalar betonlastırılıp, xojalıqlardıń qıytaq jerlerin suw menen támiyinlew jaqsılandı. Bul bolsa adamlarǵa óz qıytaq jerinen únemli paydalanıp, dáramat tabıw imkaniyatın bermekte. Máhállemizde 1000 nan aslam shańaraq, 3600 den aslam xalıq jasaydı. 60 orınlıq zamanagóy baqsha qurıldı, futbol hám vorkaut maydanshaları qurıldı. “Aqıllı máhálle” sisteması engizilip, xalıqtıń múrájatları hám máhálle infrastrukturası menen baylanıslı máselelerdi jedel sheshiw imkaniyatı keńeydi. “Bir máhálle – bir ónim” principi tiykarında pal hárreshilik de rawajlanbaqta. Házir 20 dan aslam shańaraq pal hárresin baǵıp atır. Prezidentimiz máhállesimiz Baxtiyor Jubayevtıń shańaraǵında bolıp, paldı qayta islew cexı hám pal hárre qutısın tayarlaw ustaxanası menen tanıstı. Máhállemizdiń usı miyneti arqalı jaqsı dáramat tawıp, shańaraǵın terbenip atırǵanı, basqa shańaraqlarǵa da úlgi bolıp atırǵanı biz ushın quwanıshlı. Ushırasıwda “Nuranıy” qorı Qaraqalpaqstan bóliminiń baslıǵı Tursınbay Ábdijabbarovqa kámbaǵal shańaraqlardı jumıs penen támiyinlew, olardı abadan turmısqa baǵdarlaw jumıslarına nuranıylardı keńnen tartıw wazıypası júklendi. Biz bul isenimdi “lábbay” dep qabıl etemiz. Sebebi máhállede qaysı shańaraqtıń qanday mashqalası bar ekenin, kimniń qanday óneri hám imkaniyatı bar ekenin jaqsı bilemiz. Bar tájiriybemiz hám turmıslıq kónlikpelerimiz benen olarǵa járdem beriwge tayarmız. Meniń miynet jolım da el ırısqı hám jurt abadanlıǵı menen baylanıslı bolǵan. Kóp jıllar irrigaciya tarawında miynet etkenmen. Ómir tájiriybemnen bilemen: suw óz waqtında jetkerip berilse, jer zúráát beredi. Insanǵa imkaniyat berilse, ol da miyneti menen shańaraǵınıń abadanlıǵın támiyinleydi. Búgin máhállemizde bolıp atırǵan ózgerislerge qarap, usı úlken reformalardıń nátiyjesi, bárinen burın, adamlardıń kúndelikli turmısında kórinetuǵınına jáne bir márte isendim. Bul iygilikli islerge biz, nuranıylar da óz úlesimizdi qosıwımız kerek. Muratbay QALMURATOV, Diyqan arna máhállesi nuranıyı, Qaraqalpaqstanda xızmet kórsetken irrigator.