Insan erk-ıqrarınıń sheksizligi haqqında sóz bolǵanda, kóz aldımızda táǵdir sınaqların mártlershe jeńip ótken, ómirin iygilikli hám sawaplı isler menen bezegen tulǵalar sáwlelenedi. Ámiwdárya rayonındaǵı 64-ulıwma orta bilim beriw mektebiniń mámleketlik hám huqıqıy tiykarlar páni muǵallimi Nodira Rahimova mine usınday erk-ıqrar iesi bolıp esaplanadı. Pidayı pedagog usı jılı “Jıl muǵallimi” tańlawınıń jeńimpazı boldı.
Onıń tabısqa jeteklewshi ómir jolı ańsat bolmadı. Nadira 6-klasta oqip atırganında anasınan ayırıldı. Ákesi Kenjabay aǵa perzentlerine súenish bolıp, olardı úlken ómirge tayarladı. Sheksiz sabır hám mártlik iesi bolǵan ata perzentlerin hesh qashan táslim bolmawǵa, maqsetke qaray isenimli qádem taslawǵa iytermelep háreket etti. Úlgerdi de.
Nodira mektep-internattı tamamlaǵannan soń, Nizamiy atındaǵı Tashkent mámleketlik pedagogikalıq universitetinde bilim aldı, keyin ala magistratura basqıshın da tabıslı juwmaqladı.
– Birinshi márte universitetke barǵan kúnim keshegidey esimde, – dep esleydi Nodira Rahimova. – Sonda ákem meni qolımnan jeteklep, bólmege alıp kirgen edi. Lekciya waqtında tosattan dápterim tómenge túsip ketti. Qolaysız jaǵdayda qaldım. Ornımnan turıp, onı izlep tappaqshı boldım, biraq óz betimshe háreket etiwden qorıqtım. Usı waqıtta kimdur mehir menen qolımnan uslap, dápterdi uslattı. Keyin bilsem, qasımda otırǵan Uǵılay isimli student eken. Lekciya tamam bolıp, dálizge shıqqanımızda ákem kewli óksip: “Qızım, bálkim bul jerden ketermiz? Bálkim óziń sıyaqlı adamlar menen oqıǵanıń maqul shıǵar?” dedi. Aǵama qarap: “Atajan, men salamat ortalıqqa beyimlesiwim kerek. Mine, kóresiz, bunı álbette isley alaman! Átirapımızda jaqsı adamlar kóp, maǵan járdem beredi,” dedim. Aytqanımday boldı – joqarı oqıw ornın pitkergenge shekem Wǵiloy hám Nilufar maǵan shın kewilden ǵamxorlıq etti.
Táǵdir Nadiranı xojeli Qıdırbay menen ushırastırdı. Búgingi kúnde olardıń shańaraǵında úsh perzent kamalǵa kelmekte. Úlken balası Abdulxoliq Balimbetov súwretlew ónerine júdá qızıǵadı. Bul talant oǵan ákesinen ótken hám ol qánigelestirilgen mekteptiń 11-klasında oqıydı. Qıdırbay rásmiy túrde xudojnik bolmasa da, bul óner onıń jan-júregi.
Awa, umtılǵanǵa táǵdir yar. Pidayılıq hám ilimge qushtarlıq Nadiranı jańa sheklerge jetekledi. Magistraturada oqıw dawamında filosofiya ilimleriniń doktori, professor Ibrohim Karimov basshılıǵında “Iyman hám maslak” temasında ilimiy izertlewler alıp bardı, bir neshe ilimiy maqalalar basıp shıǵardı.
Muǵallimshilikti ullı wazıypa dep biletuǵın Nadira hár bir sabaqtı qızıqlı hám mazmunlı shólkemlestiriwge háreket etedi. Tınımsız izlenedi, zamanagóy metodlardan únemli paydalanadı.
Onıń ómir filosofiyası júdá ápiwayı, biraq tereń: insan imkaniyat kútip jasamawı, kerisinshe, onı ózi jaratıwı shárt.
Ol haqıyqatında da óz imkaniyatın ózi jarattı. Miynetleri bosqa ketpedi – búgin ol elde áziz. Nodira Rahimova, sonday-aq, inklyuziv bilimlendiriwdiń eń belsendi úgit-násiyatlawshılarınan biri. Onıń atap ótiwinshe, inklyuziv bilimlendiriw – bul tek ǵana mayıplıǵı bolǵan balalardı ulıwma bilimlendiriwge tartıw emes, al hár bir oqıwshınıń individual talapların esapqa alǵan halda sapalı bilim alıw huqıqın támiyinlew bolıp esaplanadı.
Qaharmanımız tabıslarınıń tiykarında ákesi menen birge ustazlarınıń ornı teńsiz ekenin atap ótip, internattaǵı baslawısh klass muǵallimi Halima Ahmedovanıń xızmetlerin ayrıqsha tilge aladı. Ol oqıǵan qánigelestirilgen mektep-internatı respublikadaǵı eń úlgili orınlardan biri edi. Bul jerdegi shın júrekten ortalıq, ustazlardıń ádepliligi hám sheksiz mehir-muhabbatı bolajaq pedagogtıń kewlinde óshpes iz qaldırdı. Jwra aǵa Hasanov, Zulayha Hasanova, Zamira Ergasheva sıyaqlı pidayı trenerler Nodiranıń kamalǵa keliwinde úlken súenish boldı. Keyin ala mekteptegi ustazları Almagúl Xalimbetova hám Hulkar Yarashevalardıń sabaqlardı janlı hám shın kewilden ótkeriwi onıń ushın ayrıqsha mektep wazıypasın óteydi. Geografiya páni muģallimi Maqsuda Abdullayevanıń: “Pedagogtıń sabaqtı bosqa ótiwge haqısı joq!” degen násiyatı bolsa búgin de oniń qulaģı astında jańlaydı. Bul sózler ápiwayı násiyat emes, al onıń pútkil turmıslıq másláhátine aylandı.
Jumıs iskerligindegi jaqın járdemshisi Muqaddas Twraboeva bolsa hár qádemde oǵan iyinles bolıp kelmekte.
Búgin Nodira Rahimova óz oqıwshılarına tek huqıqtanıw tiykarların emes, al turmıstıń eń joqarı nızamın – mártlik, mehir hám adamgershilikti úyretpekte. Onıń ómir jolı qarańǵılıqtı nurǵa, tosqınlıqlardı imkaniyatqa aylandıra alǵan kúshli erk-ıqrar úlgisi bolıp esaplanadı.
F.ABDURAIMOVA.
