Prezidentimiz 29-sentyabr kúni Samarqand qalasında bolıp ótken Pútkiljáhán shaxmat olimpiadası hám 3-para shaxmat olimpiadasında tariyxıy jeńisti qolǵa kirgizgen Ózbekstan saylandı komandası aǵzaları, olardıń ata-anaları hám trenerleri menen ushırasqan edi.

Samarqand qalasında ótkerilgen 46-Pútkiljáhán shaxmat olimpiadası hám 3-para shaxmat olimpiadasında dúnyanıń 200 den aslam mámleketinen 2 mıńǵa shamalas eń kúshli hám belgili grossmeysterler, ataqlı komandalar qatnastı.

Itibarlı tárepi, bul abıraylı olimpiadada elimizdiń abırayın qorǵap atırǵan Ózbekstan saylandı komandası aǵzaları jeńimpazlıqtı qolǵa kirgizdi.

Sonday-aq, jarısta para shaxmachılar da múnásip qatnasıp, mámleketimiz tariyxında birinshi márte bronza medalın qolǵa kirgizdik. Men de usı olimpiadada jeke esapta eki – gúmis hám bronza medalın qolǵa kirgizdim.

Álbette, bul óz-ózinen bolmaydı. Bunıń ushın tınımsız miynet, háreket zárúr. Qarsılaslarımız kúshli edi. No, mı spravilis!

Keskin ótken sheshiwshi 7-tur oyınlarında Ózbekstan-1 komandası kúshli qarsılas – Izrail saylandı komandası ústinen 2,5:1,5 esabında isenimli jeńiske eristik. Turnir juwmaǵında Ózbekstan para shaxmachılar saylandı komandası 11 upay menen 3-orındı ielewge miyasar boldıq.

Mine usınday joqarı nátiyjelerge erisiwimiz álbette, Prezidentimizdiń biz jaslardı hár tárepleme qollap-quwatlawı hám jaratılıp berilip atırǵan keń imkaniyatlardıń nátiyjesi bolıp esaplanadı.

Men Prezidentimizdiń shaxmat boyınsha Ózbekstan saylandı komandası aǵzalarına jollaǵan qutlıqlawınan júdá ruwxlandım. Ásirese, “Sizler – Jańa Ózbekstan qaharmanları, jáhán shaxmat áleminde jańa tariyx jaratqan altın áwladsız. Pútkil xalqımız sizler menen sheksiz maqtanadı, maqtanadı,” – degen sózleri barlıq shaxmachılarǵa kelesi jarıslarda jáne de joqarı nátiyjeler kórsetiwge kúsh-ǵayrat baǵıshladı. Álbette, bul bizge bildirilgen joqarı isenim hám juwapkershilik, qalaberse, keleshekte jáne de jaqsı nátiyjelerge erisiwimizde úlken kúsh baǵıshlaydı.

Mámleketimiz basshısınıń shaxmachılardı qutlıqlawǵa baǵıshlanǵan saltanatlı ilajda men de komanda aǵzası sıpatında qatnasıp, Prezidentimiz benen ushırasıwday úlken arzıwlarımnan birine eristim. Mámleketimiz basshısına “Men Siziń qaraqalpaqstanlı qızıńız, perzentińizmen,” – dedim maqtanısh penen. Sonday-aq, sóylesiw dawamında Prezidentimizdiń Qaraqalpaqstanǵa bolǵan saparı Qaraqalpaqstan jasları ushın úlken itibar ekenin atap ótip, qaraqalpaqstanlı jaslar atınan minnetdarshılıq bildirdim.

Prezidentimizdiń Pármanına muwapıq “Mardlıq” ordeni menen sıylıqlandım. Qalaberdi, ushırasıwda Prezidentimiz biz shaxmachılardıń miynetlerin ayrıqsha atap ótti. Volkswagen avtomobili, eki bólmeli kvartira hám 50 mıń AQSh dolları muǵdarındaǵı aqshalay sıylıqtı jeke ózi tapsırdı.

Aytıń, mine usınday ullı mártebeli mámleket basshısı, mine usınday perzentleri ulıǵlanǵan jurt jáne qayda bar?!

Bul Jańa Ózbekstan, Úshinshi Renessans, keleshegi ullı mámleket qurıwǵa umtılıp atırǵan, bul jolda ul-qızların qollap-quwatlap atırǵan húrmetli Prezidentimizdiń biz jaslarǵa kórsetip atırǵan atalarsha ǵamqorlıǵı, itibarı bolıp esaplanadı. Biz bunnan júdá quwanıshlımız. Usı jerde maǵan bildirilgen joqarı isenim hám itibarı ushın Prezidentimizge sheksiz minnetdarshılıq bildiremen.

Sonı ayrıqsha atap ótiwdi qáler edim, bul joqarı sıylıqqa erisiwimde ustazım Ayna Torayevanıń miynetleri úlken. Usı jerde, meni qollap-quwatlaǵan, maǵan isenim bildirip jańa sheklerge ruwxlandırıp atırǵan Prezidentimizge, ustazlarıma, ata-anamǵa minnetdarshılıq bildiremen.

Keleshekte jáne de jaqsı nátiyjeler menen elimizdiń abırayın arttırıwǵa wáde beremen.

Selbi KAKIShOVA,

46 – Pútkiljáhán shaxmat olimpiadası hám 3-para shaxmat olimpiadası qatnasıwshısı,

“Mardlik” ordeni iyesi.