Президентимиз Ўқитувчи ва мураббийлар кунига бағишланган тантанали маросимдаги маърузасида синф раҳбари масаласига ҳам алоҳида эътибор қаратди.
Дарҳақиқат, бугун мактаб, оила, маҳалла ҳамкорлиги ниҳоятда муҳим. Бундай ҳамкорликда синф раҳбарининг роли каттадир. Синф раҳбари доимий равишда ота-она ва болаларини кузатиб боради.
Ҳозирги замон синф раҳбари ота-оналар билан ҳамкорликни яхши йўлга қўйиши учун янги педагогик технологияларни, АКТ ни яхши билиши керак. Ўқувчилар учун ман қилинган қоидаларни синф мажлисларида тушунтириши лозим. Муаммоли вазиятларга моҳирона ечим излаб топиши ва мунтазам равишда ота-оналар билан алоқада бўлиши мақсадга мувофиқ. Синф раҳбарига юклатилган масъулият ва вазифалар қанчалик қийин эканлигини англаш учун мисол тариқасида бир муаммони келтираман.
Айтайлик, бошланғич синфларда ўқувчи аъло баҳога ўқиган, лекин кейинчалик унинг ўзлаштириши пасайиб кетган. Синф раҳбари бу вазиятни унинг ота-онасидан суриштириб, боланинг арзимаган хатоси туфайли отаси қаттиқ жазолаганини билади. Оиладаги ўта қаттиққўлликдан бола норози бўлган. Сизнингча бу ерда ўқитувчи қандай йўл тутиши керак?
Ушбу вазият кўпгина синф раҳбарлари фаолиятида учрайдиган ҳолат. Синф раҳбари юқоридаги каби вазиятда ўқувчи ва унинг ота-онаси билан алоҳида-алоҳида тушунтириш ишларини олиб боради. Ўқувчига ота-онадан ҳеч қачон хафа бўлиш мумкин эмаслигини, уларнинг берган даккиси ҳам яхшиликка, фарзандларнинг порлоқ келажаги учун хизмат қилишини тушунтиради.
Хулоса қилиб айтадиган бўлсак, синф раҳбари таълим-тарбия жараёнининг режиссёри. Шу боис, биз синф раҳбари сифатида ҳам, устоз сифатида ҳам келажак авлод онгги ва шуурида Юртбошимиз Шавкат Мирзиёев таъкидлаганларидек, “Moддий ва маънавий ҳаётни уйғун ривожлантиришимиз керак”. Бугунги кун синф раҳбари ўқувчилар тарбиясидаги бўшлиқлар ва ўзгаришларнинг олдини олиш учун Президентимиз томонидан белгиланган 5 ташаббусга ёндашган ҳолда иш тутсак, албатта фойдадан ҳоли бўлмайди. Aйниқса, ёшлар ўртасида китобхонликни йўлга қўйиш жуда муҳимдир.
Зеро, китоб ҳар қандай шароитда ҳам инсонга энг яқин дўст,йўл кўрсатувчи машъала эканлигини унутмаслик лозим.
Мияссар Исмоилова,
Тўрткўл тумани 5-сонли умумий ўрта таълим мактабининг Она тили ва адабиёти фани ўқитувчиси.
