Бугун дала дашт уйғонган. Табиат эгнига яшилдан либос кийиб кўзларни қувнатмоқда. Шу кунларда далаларда иш қизғин. Айниқса, иссиқхоналарда фаолият юритаётган аёл-қизларимиз бозорларга ниҳол етказиб беришдан тортиб, мева-чеваларгача бадастир қилиш ҳаракатига тушишган. Шу ўринда Амударё тумани «Чойкўл» овул фукаролар йиғини «Дўстлик» овулида истиқомат қилаётган Зумрад Жабборовани замон билан ҳамнафас қадам ташлаётган аёл-қизлардан дейиш мумкин.

— Давлатимиз томонидан биз аёл-қизларга яратиб берилаётган имконият ва шароит боис елкамизга офтоб тегди. Айниқса, «Аёллар дафтари»га киритилган хотин-қизларга кўрсатилаётган ғамхўрлик бу инсон қадрининг нақадар улуғланаётганидан дарак беради.Биргина ўзимдан мисол. Томорқамда дастлаб 2 сотих ердан иссиқхона ташкил қилдим. У ерда бодринг, кўкатлар етиштириб эрта баҳордан бозорга чиқара бошладим. Кейинчалик ишларим ривожланиб аста-секин  буюртмачилар сони ортди. Натижада банкдан 15 млн сўмлик кредит олдим. Эндиликда турмуш ўртоғим Комилжон билан оилавий иш юритяпмиз. Маҳалладошларимдан бир нечтасини иш билан таъминлашга эришдим, «Меҳнатнинг таги роҳат» деб бежиз айтишмас экан,мана,роҳатини кўряпмиз. Хонадонларимизни таъмирлаб,томимизни ёпиб олдик. Ҳалол меҳнат ортидан жамиятда ўз ўрнимни топаётганимдан хурсандман, — дейди Зумрад Жабборова.

Тиниб-тинчимаган Зумрад меҳнати ортидан «Аёллар дафтари»дан чиқиб бугунги кунда иш ўринлари яратишга эришди.

Маълумки, узумчилик боғдорчиликнинг қадимий тармоқларидан саналади. Мақоланинг галдаги қаҳрамони Беруний туман «Шоббоз» овул фуқаролар йиғини Ибн Сино маҳалласида истиқомат қилувчи Раъно Юлдашевадир. «Раъно Камаловна» раҳбарлигидаги боғдорчилик фермер хўжалигида жами 14 гектар ер мавжуд бўлиб,3 гектарига узумнинг маҳаллий «тойпи» нави етиштирилади. Маржондек тизилиб турган узумларни кўрган киши борки, хаваси келмасдан иложи йўқ. Аёл боши билан ҳам оиласи ҳамда юрт равнақига ҳисса қўшиб келаётган Раъно опа меҳнатдан асло қочмайдиганлар хилидан…

– Туманимизда тадбиркор аёллар жуда кўп. Сир эмас,хотин қизлар давлатимиз ҳимоясида. Ва бу мени жуда хурсанд қилади. Ерни боқсанг, ер сени боқаркан. Меҳнатимиз ортидан биргина узумчиликнинг ўзидан йилига 25-30 млн. сўм атрофида даромадга эга бўляпман, — дейди Раъно Юлдашева биз билан суҳбатда. Дарҳақиқат, сўнгги йилларда хотин-қизларни қўллаб-қувватлаш борасида самарали ишлар амалга ошириляпти.

Беруний туманидан Нодира Қутлимуродова «Аёллар дафтари»нинг иккинчи тоифаси, яъни тадбиркорлик билан шуғулланиш истагида бўлган хотин-қизлар рўйхатига киритилган бўлиб,бугунги кунда 33 млн. сўмлик имтиёзли кредит олиб касаначилик билан шуғулланмоқда. Шунингдек, унга Беруний туман аҳоли бандлигига кўмаклашиш маркази томонидан субсидия асосида 25 та тикув машинаси берилди.

–Ёшлигимдан тикувчиликка қизиқаман.Олдин парда,кўрпа-ёстиқларни буюртма асосида бир ўзим тикардим.Давлат томонидан қўллаб-қувватланаётганим менга куч бериб, иш фаолиятимни кенгайтириш фикри туғилди ва тикувчилик цехини йўлга қўйдим. Бундан мақсад маҳалламиздаги ишсиз ва «Аёллар дафтари»га киритилган тенгдошларимнинг бандлигини таъминлашдир,-дейди суҳбатдошимиз.

Юртимизда хотин-қизлар муаммоларини бартараф қилиш ва уларга муносиб турмуш шароитини яратиб бериш борасидаги ислоҳотлар бугун бўй кўрсатмоқда. Янгиланаётган юртда янгича ютуқларга эришилмоқда.

Фотима АБДУРАИМОВА.

Журналист.