Жорий йил 29 июнь куни Қорақалпоғистон Республикаси Жўқорғи Кенгесининг йигирма олтинчи  сессияси бўлиб ўтди. Унга Ўзбекистон Республикаси Олий Мажлиси Сенати ва ҳукумат аъзолари, вазирлик ва идоралар, корхона-ташкилотлар, ҳуқуқни муҳофаза қилиш органлари раҳбарлари ва оммавий ахборот воситалари вакиллари қатнашди.

Сессияни Қорақалпоғистон Республикаси Жўқорғи Кенгеси Раиси М.Ерниязов кириш сўзи билан очди ва бошқариб борди.

Депутатлар  сессиянинг Котибиятини сайлади ва кун тартибини тасдиқлади. Таъкидланганидек, ­Қорақалпоғистон ҳамиша Президентимизнинг диққат-эътиборида бўлиб ­келмоқда. Сўнги икки ярим йил ичида Шавкат ­Мирзиёев Республикамизда беш марта бўлиб, жараёнлар билан яқиндан танишди. 2018 йилнинг 15-16 ноябрь кунларидаги сафаридан сўнг 11 триллион 534 миллиард сўмлик 793 та лойиҳа қабул қилиниб, шунинг натижасида 12 минг­дан ортиқ янги иш ўринлари яратилмоқда.

Бундан ташқари, Мўйноқ тумани бўйича иккита қарор қабул қилинди. Қонликўл туманида кенг кўламли қурилиш ва реконструкция ишлари олиб борилмоқда. “Шорбулақ” сув сақлагичи, “Тебинбулақ” конида металлургия комплекси  қурилиш ишлари бошлаб юборилган бўлса, барча шаҳар ва туманларда “Обод маҳалла”, “Обод қишлоқ” Давлат дастурлари бўйича ишлар давом этмоқда. Ёшлар тарбиясидаги бешта  ижобий ташаббус, шунинг­дек, “Ёшлар келажагимиз” дастури бўйича самарали ишлар амалга оширилмоқда.

Президентимизнинг Бирлашган Миллатлар Ташкилотининг 72-сессиясида дунё жамоатчилиги эътиборини Орол муаммосига қаратгани, яқиндагина Бишкек шаҳрида бўлиб ўтган Шанҳай ҳамкорлик ташкилоти давлат раҳбарлари Кенгашининг навбатдаги йиғилишида, Душанбе шаҳрида бўлиб ўтган Осиёда ҳамкорлик ва ишонч чоралари бўйича кенгашнинг бешинчи саммитида бу муаммони яна бир маротаба кўтариб чиққанлиги халқимизга бўлган эътибор ва алоҳида ғамхўрлигининг натижасидир.

Юртимиз обрўсини оширишга ҳисса қўшиб ­келаётган, ижтимоий-сиёсий фаоллиги, намунали ишлари билан ажралиб турадиган 14 ёшдан 30 ёшгача бўлган ёшларга “°мит ушқыны”, турли соҳаларда фидоийлик кўрсатиб, юртимизнинг ижтимоий-иқтисодий ривожига муносиб ҳисса қўшиб келаётган инсонлар учун “Ўатан пидайысы”, меҳнат фаолияти давомида юқори натижаларга эришиб, катта обрў қозонган, оилаларнинг мустаҳкамлигини таъминлашга ҳисса қўшиб келаётган фахрийлар учун “Ардақлы нураний” эсдалик нишонлари жорий қилинмоқда.

Ўзбекистон Республикаси ­Президенти Шавкат Мирзиёевнинг Олий Мажлис Сенатининг йигирманчи ялпи мажлисидаги нутқида билдирилган фикрлар тарихий аҳамиятга эга бўлиши  билан бир қаторда, ҳар биримиз учун дастуриламал бўлди, десак муболаға бўлмайди.

Президентимизнинг “Бугун кечагидай яшаб бўлмайди”, “Қонунлар тўлиқ ишлаши учун депутатлар халққа яқин бўлиши лозим, акс ҳолда қонун қоғозда қолиб кетади”, “Қайси қонун ишламаётганини халқ орасига кириб бориб, одамлардан  сўраш керак”, “Агар аёл кишининг кўзида бир томчи ёш бўлса, демак биз уларнинг ички дунёсини билмаяпмиз”, “Ҳар бир давлат ходими ўзининг хизмати билан эгаллаб турган лавозимига  лойиқ эканини исботлаши керак”, деган фикрларидан ҳар биримиз тегишли хулоса чиқаришимиз керак.

Бугунги кунда Президентимиз раҳбарлигида барча соҳаларда кенг кўламли ислоҳотлар амалга оширилмоқда. Бу эзгу ишларнинг замирида инсон манфаатларини ҳимоя қилиш, одамларни ҳаётидан рози қилиш, юртимизнинг бундан кейин ҳам ривожланишини таъминлаш сингари катта мақсадлар мужассам. Бахтга қарши, ҳаётимизга ўзининг салбий таъсирини кўрсатаётган коррупция иллати ҳали ҳамон учрамоқда. Бу эса халқимизнинг ҳаётдан, давлатдан норози бўлишига, жиноятчиликнинг келиб чиқишига сабабчи бўладиган омиллар ҳисобланади. Шунинг учун юртимизда ­Президентимиз раҳбарлигида бу иллатларга қарши курашиш механизмлари яратилмоқда. Хусусан, фуқароларнинг ҳуқуқ ва эркинликларини ишончли  ҳимоя қилиш, қонун устуворлигини таъминлаш, суд-ҳуқуқ тизимини янада ислоҳ қилиш, шунингдек, коррупцияга қарши курашишнинг ҳуқуқий механизмларини  яратиш  бўйича бир қатор ишлар олиб борилмоқда. Айниқса, 2017 йил “Коррупцияга қарши курашиш тўғрисида”ги қонуннинг, Президентимиз томонидан “Ўзбекистон Республикасида коррупция­га қарши курашиш тизимини янада такомиллаштириш чора-тадбирлари тўғрисида”ги фармоннинг қабул қилиниши унга қарши курашишдаги муҳим қадамлардан ҳисобланади.

Президентимизнинг 27 май куни қабул қилинган фармонига мувофиқ жорий йил 1 августдан бошлаб эксперемент тарзида ­дастлабки босқичда капитал қурилиш ва олий таълим соҳаларида “Коррупциясиз соҳа” лойиҳасини амалга ошириш белгилаб берилди.

Сессиянинг кун тартибидаги  дастлабки муҳим масала Ўзбе­кистон Республикаси Президентининг “Ўзбекистон Республикасида коррупцияга қарши курашиш тизимини янада такомиллаштириш чора-тадбирлари тўғрисида”ги фармонидан  келиб чиқадиган вазифалар ҳақида Қорақалпоғистон Республикаси Прокурори Х.Каримов нутқ сўзлади. Бу бўйича тегишли қарор қабул қилинди. Шунингдек, коррупцияга қарши курашиш соҳасидаги ишларнинг ҳолатини ўрганиш бўйича комплекс чора-тадбирлар режаси ва комиссия таркибини тасдиқлаш тўғрисидаги масала кўриб чиқилди. Депутатлар бу бўйича тегишли қарор қабул қилди.

Шундан сўнг Қорақалпоғистон Республикаси Жўқорғи Кенгесининг айрим қўмиталарига ўзгартиш киритиш тўғрисидаги масала кўриб чиқилди. Бу ўзгартиришни  киритишдан асосий мақсад,  коррупция­га қарши курашиш бўйича Президентимиз томонидан белгилаб берилган вазифаларнинг ижросини таъминлаш, соҳадаги давлат сиёсатини самарали  амалга ошириш, бу иллатнинг сабаблари ва оқибатларини бартараф қилиш бўйича янги тизимли чоралар кўриш, айниқса, ёшларга коррупцияга қарши курашиш бўйича ҳуқуқий билим беришдан иборатдир.

Шу асосда Жўқорғи Кенгеснинг “Қонунийлик, суд-ҳуқуқ ва фуқароларнинг ўзини ўзи бошқариш органлари масалалари қўмитаси” – “Қонунийлик, суд-ҳуқуқ ва коррупцияга қарши курашиш масалалари қўмитаси” бўлиб қайта тузилмоқда. Ушбу ўзгаришларнинг киритилиши муносабати билан фуқароларнинг ўзини ўзи бош­қариш органлари фаолиятини  ­мувофиқлаштириб бориш масалалари Ижтимоий-маданий ривожланиш ва жамоат бирлашмалари масалалари қўмитасига ўтказилмоқда. Бу масала бўйича тегишли қарор қабул қилинди.

Сессияда Қорақалпоғистон Республикаси Конституциясига, шунингдек, айрим қонунларига ўзгартиш ва қўшимчалар киритиш ҳақидаги масала тўғрисида Жўқорғи Кенгеснинг қўмита раиси С.Турманов маъруза қилди. Депутатлар бу бўйича тегишли қарор қабул қилди.

Шундан кейин, “Ёшлар келажагимиз” давлат дастурининг ижроси бўйича олиб борилаётган тадбирлар ҳақида Ўзбекистон Ёшлар иттифоқи Қорақалпоғистон Республикаси Кенгаши раиси А.Данияров маъруза қилди. Бу масала бўйича Тўрткўл тумани ҳокими Я.Бабажанов нутқ сўзлади. Кун тартибидаги мазкур масала бўйича ҳам ­тегишли қарор қабул қилинди.

Сессия Жўқорғи  Кенгес ­Президиуми томонидан сессиялар оралиғида қабул қилинган тегишли қарорларни тасдиқлаш ҳақида қарор қабул қилди.

Шунинг билан Қорақалпоғистон Республикаси Жўқорғи Кенгесининг ­йигирма олтинчи сессия­си ўз ишини якунлади.

Қорақалпоғистон хабар агентлиги.