Ҳурматли ватандошлар!
Бугунги кунда эркин ва фаровон юртимизнинг барча соҳалари ривожланиб, шаҳар ва қишлоқларимиз обод бўлиб, халқимизнинг турмуш даражаси ҳар қачонгидан ҳам яхшиланиб бормоқда.
Албатта, кўз олдимизда юз бераётган бундай ўзгариш ва янгиланишлар шу юртда яшаб, меҳнат қилаётган ҳар бир инсонда миллий ғурур туйғусини уйғотади.
Айниқса, жорий йил ўзининг катта бунёдкорлик ишлари, қўлга киритилган улкан ютуқлари ва улуғ мақсадлари билан ажралиб туради ҳамда ҳар бир инсонни юртимизнинг янада ривожланиши, халқимиз ҳаётининг янада фаровонлиги йўлидаги эзгу ишларга руҳлантирмоқда.
Муҳтарам Президентимиз томонидан жорий йилнинг «Фаол инвестициялар ва ижтимоий ривожланиш йили» деб белгиланиши ҳам юртимизда тадбиркорликни янада ривожлантириш, айниқса, чет эл инвестицияларини кенг жалб этишга кўплаб имкониятлар яратиши билан бирга, чет эллардаги ҳамкорлар учун барча қулайликларнинг яратилишига замин бўлмоқда.
Шунингдек, халқнинг ижтимоий турмуш тарзини яхшилаш, уларни тадбиркорликка кенг жалб қилиш мақсадида давлат дастурлари қабул қилиниб, аҳолига имтиёзли кредитлар берилмоқда.
Жумладан, «Ҳар бир оила – тадбиркор» ва «Ёшлар – келажагимиз» дастурлари, шунингдек, томорқа ер эгаларини қўллаб-қувватлаш, ҳунармандчиликни ривожлантириш, хотин-қизларни ҳамда аҳолининг бандлигини таъминлаш жамғармалари орқали халқимиз орасида тадбиркорликни ривожлантириш учун имтиёзли кредитлар ажратилмоқда.
Буларнинг барчаси ҳар бир фуқаронинг ўз олдига қўйган мақсадларига эришиш йўлида ишончли интилиши, ўйлаган ниятларига эришишига, халқимизнинг замон билан ҳамнафас қадам ташлашига мустаҳкам асос бўлмоқда.
Шу билан бирга, бугунги кунда ҳукуматимиз томонидан тадбиркорликни ҳар томонлама қўллаб-қувватлашга, уларга барча қулай шароитларни яратиб беришга, тадбиркорлар олдида турган ҳар қандай тўсиқларни олиб ташлашга, уларнинг фаолиятига ноқонуний аралашишларнинг олдини олишга қаратилган кўплаб махсус фармон ва қарорларнинг қабул қилингани халқимиз учун катта имкониятлар эшигини очиб бермоқда.
Бу ўз навбатида табиий бойликларга тўла бўлган ўлкамиз ресурсларидан оқилона фойдаланиш, барча ҳудудларда саноат, ишлаб чиқариш, хизмат кўрсатиш, қишлоқ хўжалиги ва бошқа соҳаларда тадбиркорликни кенг жорий этиш чораларини янги босқичга кўтаришга асос бўлмоқда.
Шунинг натижасида халқимизнинг барча қатлами, айниқса, ёшларнинг ўз севган касби билан шуғулланишига, уларнинг аниқ иш ўринлари билан таъминланишига, ҳар бир оиланинг турмуш даражаси яхшиланишига эришилмоқда.
Бугунги кунда тадбиркорларни моддий қўллаб-қувватлаш борасида уларга тижорат банклари томонидан кўпгина имтиёзли кредитлар берилиши, давлат мулклари, бўш турган биноларнинг бепул ажратилиши, солиқ тўловларидан имтиёзлар берилиши, ҳудудларда эркин иқтисодий зоналарнинг ташкил этилиши тадбиркорларга бўлган юксак ишонч ва ғамхўрликнинг ёрқин ифодасидир.
Муҳтарам Президентимизнинг халқчил сиёсати натижасида кўпгина ривожланган давлатлар билан инвестициявий ва савдо-иқтисодий муносабатларнинг йўлга қўйилиши, ташқи ва ички бозорларнинг эркинлаштирилиши халқимизнинг кенг кўламда тадбиркорлик билан шуғулланиши, чет эл инвестицияларининг тўсиқларсиз олиб келиниши, импорт ва маҳсулотлар экспортининг эркинлашувида муҳим ўрин тутмоқда.
Шуни фахр билан таъкидлаш жоизки, бугунги кунда юртимизда тадбиркорлик ва кичик бизнесни ривожлантириш борасида кўпгина самарали ишлар амалга оширилмоқда. Хусусан, оилавий тадбиркорлик, хотин-қизлар, имконияти чекланган фуқароларни тадбиркорликка кенг жалб этиш борасида қатор ютуқларга эришилмоқда.
Шунинг натижасида аҳолининг бандлигини таъминлаш, уларнинг ижтимоий турмуш даражаси яхшиланишида, шу билан бирга, миллий маҳсулотларимиз кўлами кенгайиши, кичик саноат ва ишлаб чиқариш сифатининг ошиши, ички бозоримизнинг сифатли маҳсулотлар билан таъминланиши ва республикамиз экспорт салоҳиятининг ортишида бир қатор ютуқлар кўзга ташланмоқда.
Шундай экан, ҳар биримиз бор имкониятлардан самарали фойдаланган ҳолда тадбиркорлик билан шуғилланиб, юртимизни ижтимоий-иқтисодий ривожлантиришда, ўз оиламизнинг даромадини ошириб, унинг фаровонлигини таъминлашда, Ватанимиз ва оиламиз олдидаги инсонийлик фарзимизни бажаришда фаол қатнашишга чақирамиз.
Шуни ҳам унутмаслигимиз керакки, халқимизга яратилаётган бундай кенг имкониятларга меҳнатимиз ва ютуқларимиз билан жавоб қайтариб, келажагимизнинг ишончли пойдеворини яратишда ҳар биримиз ўз ҳиссамизни қўшмоғимиз, келажак авлодга намунали ишларимиз билан ўрнак бўлмоғимиз ва бундай эзгу ишларда ўз ўрнимизга эга бўлишимиз лозим.
Демак, бугунги асосий вазифамиздан бири – бу ҳар биримиз ўз олдимизга аниқ мақсад қўйиб, бор куч-ғайратимизни ва билимимизни сафарбар этиб, берилган имкониятлардан оқилона ва ўз вақтида самарали фойдаланиб, ўз бизнесимизни, тадбиркорлик фаолиятимизни бошлашимиз керак.
Бутун халқимизни, ўз Ватанига, оиласига содиқ ҳар бир азаматни, хотин-қизларимизни, ёшларимизни бугунги куннинг беминнат имкониятларидан фойдаланган ҳолда жадал ривожланаётган замон талаблари асосида олға интилиб, тадбиркорлик фаолиятини йўлга қўйишга чақирамиз!
Қадрли замондошлар!
Ҳукуматимиз томонидан тадбиркорликни қўллаб-қувватлаш борасида яратилаётган имкониятлардан самарали фойдаланиб, бугунги кунда фаолият юритаётган барча тадбиркорлардан кўпчиликка ўрнак бўлиб, ватандошларимизга, ўз яқинларимизга, ёшларимизга ҳаётий тажрибаларидан келиб чиқиб маслаҳатлар беришини, устозлик қилишини ва йўл-йўриқ кўрсатишини, ўзларининг олиб бораётган эзгу ишларини давом эттириб, янада юқори натижаларга эришишларини сўраймиз!
Сизларни яна бир бор ҳар бир кундан ва имкониятлардан самарали фойдаланиб, ўз бизнесингизни бошлаб, уни йўлга қўйишга ҳеч иккиланмай қадам ташлашга, ҳуқуқ ва эркинлигингиздан тўлиқ фойдаланишга, юртимизни янада ривожлантиришга бор куч-ғайратингизни сафарбар қилиб, тадбиркорликни йўлга қўйишга чақирамиз!
