Xojeli rayonındaǵı “Qırqınshı” mákan puqaralar jıyınında 2 mıń 253 xalıq jasaydı. Sonnan 1 mıń 150 i hayal-qızlar, 694 i jaslardan ibarat.

Máhállede xalıqtıń turmıs sharayatın jaqsılaw, kámbaǵallıqtı qısqartıw, jumıssız puqaralardıń bántligin támiyinlew jáne kishi biznes hám jeke menshik isbilermenlikti rawajlandırıw boyınsha izbe-iz jumıslar alıp barılmaqta. Atap aytqanda, “máhálle kesiminde” islew sisteması tiykarında hár bir shańaraqtıń jaǵdayı úyrenilip, mútáj qatlamǵa mánzilli járdem kórsetilmekte.

Jumıssız puqaralardı bánt etiw maqsetinde olardı kásip-ónerge oqıtıw, máwsimlik hám turaqlı jumıs orınlarına baǵdarlaw jumısları jolǵa qoyılǵan. Jaslar hám hayal-qızlardı isbilermenlikke tartıw maqsetinde bolsa olarǵa jeńilletilgen kreditler hám subsidiyalar ajıratılmaqta.

Sonday-aq, máhállede abadanlastırıw hám kóklemzarlastırıw jumıslarına ayrıqsha itibar qaratılmaqta. Kóshe hám qıyabanlar ońlanıp, jaqtılandırıw sistemaları jańalanbaqta, xalıqtıń dem alıwı ushın qolaylı ortalıq jaratılǵan.

Bul mákan puqaralar jıyını aymaǵında jaslardıń bos waqtın mazmunlı shólkemlestiriw, jaqsı bilim alıwı, kásip-óner úyreniwi, sport hám dóretiwshilik penen shuǵıllanıwı ushın da qolaylı imkaniyatlar jaratılǵan. Sonıń ishinde, “Bes baslama olimpiadası” sheńberinde ótkerilip atırǵan bellesiwlerde máhálledegi kóplegen qábiletli jaslar belsene qatnaspaqta.

M.HABIBULLAEV túsirgen súwret.