Tórtkúlde miynetti ómir mazmunına aylandırǵan, jerdiń hár qarısın jan dep biletuǵın hayallar kópshilikti quraydı. Mine, usınday pidayılardan biri Ullıbaǵ awıl puqaralar jıyınında jasawshı Norgul Abdullaeva bolıp esaplanadı.

Búgin ol 73 jastı qarsılap atırǵan bolsa da, qálbindegi miynetke muhabbat, jerge degen mehir ele jas.

Balalıǵınan diyqanshılıq penen tanıs bolǵan Nargúl ana kelin bolıp túsken shańaraǵında da jer menen “tillesiwdi” dawam ettirdi. Kishkene qıytaq jerinde gúl tárbiyalap, limon ósirdi. Ol qaysı jumısta bolmasın jerden alıslap ketpedi.

1970-jılı ómirlik joldası, marhum Rwzimbay aǵa menen turmıs qurǵan Norgul ana pútkil ómiri dawamında diyqanshılıqqa sadıq boldı. 2018-jılǵa kelip, onda úlken árman – baǵ jaratıw ideyası payda boldı. Jer ajıratıw boyınsha múrájatı unamlı sheshilgennen soń, istiń kózin bilgen apa dárhal háreketke kiristi. Mámleketten 120 million sum kredit alıp, ıssıxana hám baǵ shólkemlestirdi. Hátte jıynap qoyǵan 500 mıń sumdı da ayamay usı jumısqa jumsadı.

Búgin bolsa 25 gektar jer maydanınıń 10 gektarında ıssıxana, 15 gektarında baǵ jaratılǵan.Íssıxanada 600 den aslam túrdegi gúller tárbiyalanadı. Baǵda bolsa almurt, alma, erik, ǵoza, qáreli sıyaqlı miyweli terekler jaynap tur.

– Gúlshilik názik hám bilim talap etetuǵın taraw. Hár bir gúldiń ózine tán ózgeshelikleri bar hám olar ósiw sharayatınan kelip shıǵıp suwǵarıladı, – deydi Norgul ana. Úlken túbektegi gúller kemirek suwgarılsa, atap aytqanda, Hayal baxti (Spatifillum) gúlin topıraq arqalı suwgarıw kerek. Balzamin bolsa jaqtılıqtı jaqsı kóredi, biraq tikkeley quyash nurınan qorǵaw kerek. Azaliya, aloe vera, kaktus, geran, begoniya, qıtay gúli sıyaqlı gúller adamga zawıq beredi. Bunnan tısqarı, bólme gúllerin báhár hám jazda keshte suwǵarǵan maqul. Hár istiń óz qıyınshılıǵı bolǵanı ushın bunıń da ózine jarasa mashaqatı bar. 2021-2022-jıl biz ushın oǵada awır boldı, – dep sózin dawam etti apa qayǵılı túrde. Suwıq baǵ hám ıssıxananı urıp, ónimlerdi nabıt etti. Biraq men taslanbadım, tárbiyanı jáne de kúsheyttim.Shúkir, miynetlerim óz jemisin berdi. Shańaraǵımız pútin, ruwzıgershiligimizde bereket bar. Molshılıq- miynetten kiyatır.

Haqıyqatında da, miynettiń nátiyjesi de salmaqlı: jıllıq dáramat ádewirdi quraydı. Limonnıń ózi 30 túpke ie bolıp, hár biri 150-100 kilogrammǵa shekem ónim beredi. Gúller bazarda 5 mıń sumnan 500 mıń sumǵa shekem bahalanadı. “Bir tonna kómir alsaq, ıssıxana normada bolıp, biymálel qıstan shıǵadı,” – deydi apa qanaatlanıwshılıq penen.

Hár bir qarıs jerden zúráát alıwdı ádet etken Norgul ana 2020-jılı “Namunali tomorqachi” kókirek belgisi menen sıylıqlandı.

Búgin onıń qolları dóretken ájayıbat qıs máwsiminde de jazdıń ıssı taralıǵın úlestirmekte. Jer menen tillesken ana ushın bolsa miynet – eń úlken baxıt.

F.ABDURAIMOVA.