Ózbekstan Respublikası Prezidenti Shavkat Mirziyoevtiń basshılıǵında 23-yanvar kúni ótkerilgen videoselektor májilisinde 2026-jılda kámbaǵallıqtı qısqartıw hám xalıqtıń bántligin támiyinlew boyınsha tiykarǵı wazıypalar belgilep alındı. Mámleket basshısı sońǵı bir jılda 366 mıń shańaraq kámbaǵallıqtan shıqqanın, kámbaǵallıq dárejesi 5,8 procentke, jumıssızlıq bolsa 4,8 procentke túskenin atap ótti. Biraq erisilgen nátiyjeler menen sheklenip qalmastan, jańa basqıshta jáne de anıq hám mánzilli ilajlar kóriw zárúr ekenligi atap ótildi. Májiliste tiykarǵı itibar subsidiya hám finanslıq qollap-quwatlaw mexanizmlerin keńeytiwge qaratıldı. Usı jılı 1 million xalıqtı turaqlı jumıs penen támiyinlew, 181 mıń shańaraqtı kámbaǵallıqtan shıǵarıw hám jumıssızlıq hám kámbaǵallıq dárejesin 4,5 procentke túsiriw wazıypası qoyıldı. Bul maqsetlerge erisiwde mámleket tárepinen beriletuǵın tikkeley finanslıq járdem áhmietli orın ieleydi. Atap aytqanda, 903 “awır” máhállede quwatlılıǵı 300 kilovatt bolǵan kishi quyash elektr stanciyaları qurılıp, 7 jılǵa procenciz lizing tiykarında beriledi. Bul joybar tek ǵana turaqlı elektr támiynatın támiyinlep qoymastan, al máhálleler ushın qosımsha dáramat dáregin de jaratadı. Alınatuǵın “jasıl” dáramatlar járdemge mútáj shańaraqlardı qollap-quwatlawǵa, energiya únemleytuǵın ońlaw jumıslarına baǵdarlanadı. Awıl xojalıǵında da subsidiyalar kólemi keńeytilmekte. Qıytaq jer ieleri hám diyqan xojalıqlarına sertifikatlanǵan náller satıp alıwınıń 50 procenti byudjet esabınan qaplap beriledi. Miywe jetistiriwde “shpaler”ler ushın 20 mıń sumnan 70 mıń sumǵa shekem subsidiya ajıratıladı. Tamshılatıp suwǵarıw sistemasın engizgenlerge hár bir sotıx ushın 160 mıń sum kompensaciya tólenedi. Eksportqa jaramlı ónim jetistiriwdi shólkemlestirgen sheber diyqanlar bolsa 2 million sumnan 75 million sumǵa shekem sıylıq aladı. Sonday-aq, pilleshilikti rawajlandırıw maqsetinde kooperaciya shólkemlestirgen mútáj shańaraqlarǵa 4 million sum subsidiya, úy sharayatında pille jetistiriw ushın bolsa 20 million sumǵa shekem procenciz ssuda ajıratıladı. 2 mıń gektar toǵay jerleriniń 4 mıń kámbaǵal shańaraqqa 10 jılǵa biypul beriliwi de xalıqtıń bántligi hám dáramatın arttırıwǵa xızmet etedi. Ulıwma, májiliste kámbaǵallıqtı qısqartıwdıń jańa basqıshı bárinen burın mánzilli subsidiyalar, jeńilletilgen qarjı resursları hám xoshametlew mexanizmlerine súenetuǵının kóriw múmkin. Mámleketlik qollap-quwatlaw arqalı máhállelerde ekonomikalıq belsendilikti kúsheytiw, xalıqtıń turaqlı dáramat dáregin qáliplestiriw hám sociallıq turaqlılıqtı támiyinlew tiykarǵı maqset etip belgilendi. Óz xabarshımızdan.