“Nókis diyqan bazarı” administraciyasınan juwap aldıq:

Prezidentimizdiń usı jıl 16-fevraldaǵı “Múbárek Ramazan ayın múnásip túrde ótkeriw haqqında”ǵı qararında xalıqtı, ásirese járdemge mútáj qatlamlardı sociallıq qollap-quwatlaw, muqaddes ayda saqawat, awızbirshilik hám keńpeyillik ortalıǵın bekkemlewge ayrıqsha itibar qaratılǵan. Bul wazıypalardıń orınlanıwın támiyinlewde azıq-awqat ónimleriniń bahasın turaqlı saqlaw úlken áhmiyetke iye bolmaqta.

Qaraqalpaqstan Respublikasında bayramlar múnásibeti menen arzanlastırılǵan sawda yarmarkaların shólkemlestiriw jaqsı dástúrge aylanǵan. Bul ilajlar xalıqtı sapalı hám arzan ónimler menen támiyinlew, bazarda bahalardıń turaqlılıǵın saqlaw menen birge xalqımızdıń keypiyatın kóteriwge xızmet etetuǵını sózsiz.

“Nókis diyqan bazarı” hákimshiliginiń maǵlıwmat beriwinshe bazarda shólkemlestirilip atırǵan yarmarkalar – islep shıǵarıwshıdan tutınıwshıǵa, “Atızdan – dasturxanǵa shekem” uranı astında shólkemlestirilip atırǵanı xalqımızdı quwandırmaqta.

– Ásirese, múbárek Ramazan ayı múnásibeti menen shólkemlestirilip atırǵan yarmarkalar xalıqtıń máplerine xızmet etip atırǵanı ózine tán dástúr, – deydi Nókis diyqan bazar AJ bas direktorı orınbasarı Bayram Abatov. – Házirgi waqıtta yarmarkalarda 45 xojalıq júrgiziwshi subekt qatnaspaqta. Bul bolsa artıqsha dáldalshılardı qısqartıw arqalı ónimlerdiń qolaylı bahalarda satılıwın támiyinlemekte.

Bazarǵa jergilikli islep shıǵarıwshılar tárepinen ónimlerdiń turaqlı jetkerip beriliwi bahalardıń turaqlılıǵında áhmiyetli faktor bolmaqta. Atap aytqanda, “KUNGRAD GOLDEN EGG, CAMEL WAY” hám “NUKUS BROILER PRODUCTS” kárxanaları tárepinen tawıq góshi hám máyek ónimleri jetkerip berilmekte. Sonday-aq, jergilikli kárxanalar tárepinen gúrish, gósh, sút hám sút ónimleriniń keń assortimenti xalıqqa usınıs etilmekte. Bul processte “PanaMilk” hám “Moynaq sút” sıyaqlı kárxanalardıń úlesi ayrıqsha áhmiyetke iye.

Azıq-awqat ónimleriniń qáwipsizligi hám bahalardıń turaqlılıǵın támiyinlew maqsetinde qadaǵalaw ilajları da izbe-iz ámelge asırılmaqta. Atap aytqanda, Ekonomikalıq jınayatlarǵa qarsı gúresiw departamentiniń aymaqlıq basqarması jergilikli hákimiyat uyımları menen birgelikte jasalma baha artıwınıń aldın alıw ilajların kórmekte.

Sonıń menen birge, bıyılǵı qıs máwsimi ushın jámi 3435 tonna azıq-awqat hám awıl xojalıǵı ónimleri rezervke alındı. Sonıń ishinde, 998 tonna kartoshka, 540 tonna piyaz, 985 tonna geshir hám 912 tonna basqa da birinshi dárejeli ónimler jıynaldı. Bul rezervler jıl dawamında bazarda turaqlı támiynattı támiyinlew imkaniyatın beredi.

Birinshi dárejeli ónimler rezervin qáliplestiriw maqsetinde isbilermenlerge 10 milliard sum muǵdarında jeńilletilgen kredit hám subsidiyalar ajıratıldı. Nátiyjede jergilikli bazarǵa qosımsha ónimler Rossiya Federaciyası, Pakistan, Hindstan hám Mongoliya mámleketlerinen de import etilmekte.

Bazar infrastrukturasın modernizaciyalaw jumısları da izbe-iz dawam ettirilmekte. Zamanagóy sawda maydanlarınıń shólkemlestiriliwi ónimlerdi saqlaw hám satıw sharayatların jaqsılap, sanitariyalıq talaplarǵa ámel etiliwin támiyinlemekte. Bul bolsa tutınıwshılardıń isenimin jáne de bekkemlewge xızmet etpekte.

Juwmaqlap aytqanda, ámelge asırılıp atırǵan ilajlar xalıqtı sapalı hám qáwipsiz azıq-awqat ónimleri menen támiyinlew, bazarlarda bahanı turaqlı saqlaw hám isbilermenlikti qollap-quwatlawǵa qaratılǵan. Bul bolsa Ramazan ayın múnásip ótkeriw hám xalıqtıń abadanlıǵın támiyinlewde úlken áhmiyetke iye bolmaqta.

Gózzal JIYENBAEVA,

Qaraqalpaq mámleketlik universitetiniń Jurnalistika xızmet túrleri qánigeligi 2-basqısh magistrantı.