Prezidentimizdiń “Múbárek Ramazan ayın múnásip túrde ótkeriw haqqında”ǵı qararınıń orınlanıwın támiyinlew maqsetinde aymaqlarda kóplegen qayırlı jumıslar ámelge asırılmaqta.

Onda insanıylıq, jaqsılıq, shúkirshilik hám miyrim-shápáát sıyaqlı dástúr hám qádiriyatlardı qásterlep saqlaw jáne keńnen úgit-násiyatlaw maqsetinde iftarlıq hám qayırqomlıq ilajları shólkemlestirilmekte.

Múbárek Ramazan ayı – kewillerdi tazalaytuǵın, insanlardı jaqsılıqqa shaqıratuǵın, miyrim-shápáát hám saqawat sezimlerin jáne de bekkemleytuǵın muqaddes ay. Bul ayda ámelge asırılǵan hár bir sawaplı ámel, kórsetilgen jaqsılıq insan qálbinde shúkirshilik hám mehir sezimlerin oyatadı.

Ramazan ayı múnásibeti menen Bajıxana komiteti tárepinen Qaraqalpaqstan Respublikasınıń Ámiwdárya, Beruniy hám Tórtkúl rayonlarında qoy soyılıp, mútáj shańaraqlarǵa tarqatıldı. Ásirese, shetki awıllarda jasaytuǵın kem támiyinlengenler ushın bunday itibar hám ǵamqorlıq ayrıqsha quwanısh baǵıshladı.

Sonday-aq, usı rayonlarda jasaytuǵın járdemge mútáj xalıq wákilleri ushın iftarlıq dasturxanı da jayıldı. Onda shıǵıp sóylegenler xalqımızdı muqaddes Ramazan ayı menen qutlıqlap, orınlarda “Ramazan – miyrim-shápáát, awızbirshilik hám shúkirshilik ayı” ideyası tiykarında ótkerilip atırǵan ilajlar adamlar arasında miyrim-shápáát, miyrim-shápáát baylanısların jáne de bekkemlewge xızmet etetuǵının atap ótti.

Ilajda múbárek ayda imkaniyatı sheklengen, járdemge mútáj insanlardı qollap-quwatlawǵa qaratılǵan iygilikli ámeller xalqımızǵa tán adamgershilik pazıylet, miyrim-shápáát hám saqawat úlgisi ekeni atap ótildi.

D.Abibullaev.