Hár bir insannıń ómirinde anası – sheksiz qádirli. Men ushın anam – haqıyqıy mehri dárya, jánnetim. Ol haqqında sóz bolǵanda, kózlerime eriksiz jas keledi, balalıq elesleri kóz aldımda elesleydi. Anam meni “ózimniń ayqızım, quyashım” dep erkeletetuǵın, qollarımdı sıypap, keleshegim haqqında árman etetuǵın edi. Onıń muhabbatı hám isenimi arqalı men ózimniń ármanım – nawqaslarǵa járdem beriw baxtına eristim.

Ele esimde, balalıǵımda kóshemizdegi qońsı qızlar menen oynap atırǵanımda ózimshe “shıpaker” bolıp, olardı emlegenmen. Usı árman meniń ómir jolımdı belgilep berdi: paytaxtımızdaǵı 1-sanlı medicina bilim jurtın tabıslı tamamladım hám házir Respublikalıq qıstawlı medicinalıq járdem ilimiy orayı Qaraqalpaqstan filialında miyirbiyke sıpatında jumıs alıp barıp atırman. Bunnan ata-anam júdá quwanar edi.

Biraq ómir hámmeni birdey sınaqtan ótkeredi. Kútilmegende, ákem Genjebay Arzuov bul dúnyadan ótti. Sonda anamnıń kóz jasları tınbay, uyqısız tań atıp, perzentleri haqqında qayǵırdı. Qan basımı kóteriledi, bası awıradı. Degen menen, ol sır bermey, azanda mektepke asıǵatuǵın edi. Ele de ákem haqqında gáp bolsa, kózlerine jas quyılıp keledi.

Anam Zinaxan Xojamuratova kóp jıllar paytaxtımızdaǵı 29-sanlı ulıwma bilim beriw mektebinde jas áwladqa tálim-tárbiya berdi. Endi napaqa ráhátin súrip atır. “Ana qádirin ana bolǵanda bileseń,” degen sóz haqıyqatında da durıs.

Turmıs, perzentler hám kásip – hámmesi anamnıń ármanları menen baylanıslı.

Ómirlik joldasım menen birgelikte eki ul hám bir qızdı tárbiyalap, olardı kamalǵa keltirdik. Úlken ulımdı úylendirdim hám aqlıqlı boldım. Úy, bala-shaǵa, jumıs – hámmesi bir-birine baylanıslı. Kásibimnen kewlim toq. Bulardıń barlıǵı mehri dárya anamnıń úlesi.

Áziz hám mehriban anajanım, qádirli apa-qarındaslar gózzal hám múláyim hayallar! Sizlerdi 8-mart – Xalıqaralıq hayal-qızlar kúni bayramı menen shın kewlimnen qızǵın qutlıqlayman.

Ana-mehir tımsalı, sabır hám mártlik úlgisi.

Sizge uzaq ómir, bekkem densawlıq tileymen. Siziń pátiyańız hám mehir-muhabbatıńız biz ushın eń úlken baxıt hám súenish bolıp esaplanadı.

Saltanat ARZUOVA,

Respublikalıq qıstawlı medicinalıq járdem ilimiy orayı Qaraqalpaqstan filialı

nevrologiya bólimi medsestra.