Mámleketimiz turmısında Ǵárezsizlik bayramı ayrıqsha orın iyeleydi. Bul sáne tek ǵana tariyxıy waqıya emes, al xalqımızdıń ásirler dawamındaǵı arzıw-niyetleriniń ámelge asıwı, erkin hám abadan turmısqa qaray qoyılǵan bekkem qádemlerdiń belgisi bolıp esaplanadı. Ásirese, ǵárezsizligimizdiń 35 jıllıǵı aldında elimizde ámelge asırılıp atırǵan keń kólemli reformalar, ekonomikada qolǵa kirgizilip atırǵan jetiskenlikler, bilimlendiriw hám sociallıq tarawlardaǵı jańalanıwlar bul bayramnıń mazmunın jáne de bayıtpaqta.

Bul baǵdarda Ózbekstan Respublikası Prezidentiniń 2026-jıl 1-apreldegi “Ózbekstan Respublikası mámleketlik ǵárezsizliginiń 35 jıllıǵın keńnen belgilewge tayarlıq kóriw hám onı ótkeriw haqqında”ǵı qararı elimizde usı ullı sánege joqarı dárejede tayarlıq kóriw hám onı keń kólemde belgilewge huqıqıy hám shólkemlestiriwshilik tiykar bolıp xızmet etpekte. Qararda ǵárezsizlik jıllarında erisilgen jetiskenliklerdi keńnen úgit-násiyatlaw, Jańa Ózbekstan reformalarınıń mazmun-mánisin xalıq arasında nátiyjeli túsindiriw, sonday-aq, “Bir Watan, bir xalıq bolıp, jańa ómir hám keleshek jaratamız!” ideyası tiykarında ruwxıy-aǵartıwshılıq ilajlardı joqarı dárejede shólkemlestiriw wazıypaları belgilep berilgen.

Keyingi jıllarda mámleketimizde barlıq tarawlardı qamtıp alǵan túpkilikli ózgerisler ámelge asırılmaqta. Ekonomikanı diversifikaciyalaw, investiciyalıq ortalıqtı jaqsılaw, jańa jumıs orınların jaratıwǵa qaratılǵan ilajlar xalıqtıń abadanlıǵın arttırıwǵa xızmet etpekte. Eń áhmiyetlisi, bul jetiskenlikler tek ǵana sanlar hám esabatlarda emes, al hár bir shańaraqtıń turmısında, dasturxanındaǵı bereket hám turmıs dárejesinde óz kórinisin tappaqta.

Bilimlendiriw tarawına qaratılıp atırǵan itibar bolsa mámleket keleshegin belgileytuǵın eń áhmietli faktorlardan biri bolıp esaplanadı. Zamanagóy mektepler hám joqarı bilimlendiriw mákemeleri, xalıqaralıq standartlarǵa say oqıw baǵdarlamaları jáne jańa áwlad pedagogları tayarlanıp atırǵanı – erteńgi kún ieleriniń bilimli, básekige shıdamlı hám keń dúnyaqarasqa ie bolıp jetilisiwin támiyinlemekte. Bul bolsa, óz gezeginde, Jańa Ózbekstan rawajlanıwınıń bekkem tiykarın jaratadı.

Sociallıq qorǵaw sistemasın jańalaw da mámleketlik siyasattıń tiykarǵı baǵdarlarınan birine aylandı. Kem támiyinlengen shańaraqlardı qollap-quwatlaw, xalıqtıń mútáj qatlamlarına mánzilli járdem kórsetiw, medicinalıq xızmetlerdiń sapasın arttırıw sıyaqlı ilajlar insan qádirin ulıǵlawǵa qaratılǵan. Insan mápleri ústin bolǵan jámiet ǵana turaqlı hám rawajlanǵan jámiet bola aladı.

Bıyılǵı bayramnıń “Bir watan, bir xalıq bolıp, jańa ómir hám keleshek jaratamız!” ideyası da elimizdegi reformalardıń mazmunı menen úzliksiz baylanıslı. Bul súren hár bir puqaranı birlesiwge, Watannıń rawajlanıwı ushın óz úlesin qosıwǵa shaqıradı. Sebebi keleshek tek ǵana mámleketlik siyasat emes, al hár bir insannıń bilimi hám miyneti, pidayılıǵı arqalı qurıladı.

Ǵárezsizliktiń 35 jıllıǵı múnásibeti menen Respublikalıq ruwxıylıq hám aǵartıwshılıq orayı tárepinen ámelge asırılatuǵın ruwxıy-aǵartıwshılıq ilajlar da ayrıqsha áhmietke ie. Sonıń ishinde, “Ǵárezsizlik bayramı” festivalı, “Ǵárezsizligim – maqtanıshım” joybarları, sociallıq tarmaqlardaǵı úgit-násiyatlaw akciyaları, fleshmoblar, podkastlar hám viktorinalar xalqımız, ásirese, jaslardıń qálbinde watansúyiwshilik sezimlerin bekkemlewge xızmet etedi. Sonday-aq, qararda keltirilgen “Watan pidayıları” monumentiniń qurılıwı hám “Ǵárezsizlik jılnaması” kitap-albomınıń jaratılıwı tariyxqa bolǵan húrmet hám keleshek áwlad aldındaǵı juwapkershiliktiń ayqın kórinisi bolıp esaplanadı.

Juwmaqlap aytqanda, Ǵárezsizlik – bul tek ǵana sáne emes, al úlken imkaniyatlar, juwapkershilik hám abıray bolıp esaplanadı. Otız bes jıl dawamında xalqımız awır sınaqlardan ótip, ǵárezsiz mámlekechilikti bekkemledi, milliy qádiriyatların tikledi hám zamanagóy rawajlanıw jolınan izbe-iz barmaqta. Búgingi kúnde erisilip atırǵan jetiskenlikler erteńgi jáne de jarqın keleshek ushın bekkem tiykar jaratpaqta.

Elimizdegi eń úlken baylıq – tınıshlıq, milletleraralıq tatıwlıq hám dinleraralıq keńpeyillik bolıp esaplanadı. Mine, usı sheksiz jemislerdi qásterlep saqlaw, jáne de bekkemlew hár birimizden úlken juwapkershilik talap etedi. Keleshekti birgelikte, awızbirshilik hám pidákerlik miynet penen qursaq, Ǵárezsizligimizdiń nátiyjeleri jáne de ayqın kórinedi.

Nariman ShINNAZAROV,

Respublikalıq Ruwxıylıq hám aǵartıwshılıq orayı Qaraqalpaqstan bólimi bas qánigesi.