Búgingi globallasıw dáwirinde hár bir mámlekettiń turaqlı rawajlanıwı tek ǵana ekonomikalıq kórsetkishler menen emes, al onıń milliy qádiriyatları, ruwxıy potencialı hám ǵárezsizligi menen belgilenedi.

Mámleketimiz basshısı tárepinen alǵa qoyılǵan “Bir watan, bir xalıq bolıp, jańa ómir hám keleshek jaratamız!” degen ullı súren búgin Jańa Ózbekstannıń bas ideyalıq ólshemine aylandı. Bul shaqırıq xalqımızdı birden-bir maqset jolında birlestirip, jámiette tınıshlıq hám awızbirshilikti bekkemlewge xızmet etpekte.

Hár qanday jámiettiń izbe-iz rawajlanıwı, bárinen burın, xalıqtıń ruwxıy dúnyası, milliy ózligi hám puqaralıq mádeniyatına baylanıslı. Sonlıqtan, elimizde insan qádirin ulıǵlaw hám ádillikti támiyinlew menen bir qatarda, ruwxıy-aǵartıwshılıq jumıslardıń nátiyjeliligin arttırıw tiykarǵı wazıypaǵa aylandı.

Globallasıw processleri informaciya almasıwın tezletiw menen bir qatarda, “ǵalabalıq mádeniyat” hám jat ideyalar sıyaqlı ruwxıy qáwiplerdi de jetelep kelmekte. Bunday sharayatta jaslardıń ideologiyalıq immunitetin bekkemlew, olardı erkin pikirleytuǵın watansúyiwshi insanlar etip tárbiyalaw – turmıslıq zárúrlik bolıp esaplanadı. Sebebi, intellektuallıq potencial joqarı mánawiyat penen úylesken jaǵdayda ǵana jámiettiń bekkem hám turaqlı rawajlanıwın támiyinlew múmkin.

Ǵárezsizligimizdiń 35 jıllıq toyı qarsańında elimizde ruwxıy-aǵartıwshılıq jumıslar pútkilley jańa basqıshqa kóterildi. Orınlarda ótkerilip atırǵan “Ǵárezsizlik bayramı” festivalları, “Úsh áwlad” ushırasıwları, kino kárwan joybarları hám aǵartıwshılıq sóylesiwler xalıqtıń keypiyatın kóteriwge, shúkirshilik sezimin kúsheytiwge xızmet etpekte.

Xalıq, ásirese, jaslar arasında kitapqumarlıq mádeniyatın rawajlandırıw baǵdarındaǵı sistemalı jumıslar keńnen en jaydı. Atap aytqanda, Respublikalıq Ruwxıylıq hám aǵartıwshılıq orayı, Jazıwshılar awqamı, Jaslar agentligi hám Qaraqalpaqstan teleradiokompaniyası menen birgelikte shólkemlestirilip atırǵan “Bilimler bellesiwi” teleoyını jigit-qızlar arasında haqıyqıy pikirlew maydanına aylandı. Bul joybar jaslardıń intellektuallıq potencialın arttırıw hám kitapqumarlardı xoshametlewde áhmietli faktor bolmaqta.

Málimleme-kitapxana orayı tárepinen shólkemlestirilgen “Kitap – bilimler ǵáziynesi” kórgizbesi bolsa xalıq arasında kitapqumarlıq mádeniyatın arttırıwǵa múnásip úles qostı.

Ruwxıy-aǵartıwshılıq ilajlardıń máhálleler kesiminde, shańaraqlarǵa shekem kirip barıp atırǵanı jámiette salamat ortalıqtı qáliplestiriwde oǵada qolaylı bolmaqta. Qaladaǵı “Kók ózek,” “Twńǵısh qonıs,” “Allaniyaz Qaharman,” “Qutlı mákan,” “Nurlı bostan,” “Boz awıl” hám “Uzinkól” sıyaqlı máhállelerde ótkerilgen dógerek sáwbetleri usılardıń qatarına kiredi.

Bul ushırasıwlarda xalıqtıń sociallıq belsendiligin arttırıw, shańaraqta perzent tárbiyası, toy hám máresimlerdi milliy qádiriyatlar tiykarında, ıqsham hám tártipli ótkeriw máseleleri hár tárepleme dodalanbaqta.

Ásirese, “Jeke terek” máhállesinde shólkemlestirilgen “Nuranıylar turmısı – jaslarǵa úlgi” atamasındaǵı kóshpeli kitap kórgizbesi hám Nókis sanlı texnologiyalar texnikumındaǵı “Kitap oqı – keleshegińdi jarat” jarısı áwladlar arasındaǵı ruwxıy kópirdi jáne de bekkemledi.

Ǵárezsizligimizdiń 35 jıllıq toyı tek ǵana basıp ótilgen tariyxıy joldı esapqa alıw emes, al keleshektegi ullı rejelerdi belgilew ushın da áhmietli pursat bolıp tabıladı. Juwmaq ornında aytatuǵın bolsaq, ǵárezsizlik xalqımızǵa erkin hám abadan turmıs qurıw imkaniyatın bergen bolsa, mánawiyat bul imkaniyatlardan aqılǵa uǵras paydalanıw, jámiette jaqsılıq, dóretiwshilik hám awızbirshilik ortalıǵın qáliplestiriwge xızmet etedi.

Gulbahor SADIKOVA,

Respublika Mánawiyat hám aǵartıwshılıq orayı Nókis qalalıq bólimi bas qánigesi.