Mámleketimizde keyingi jılları aymaqlardı kompleksli rawajlandırıw, xalıqtıń turmıs dárejesin jaqsılaw hám infrastrukturanı zaman talapları tiykarında jańalaw mámleketlik siyasattıń tiykarǵı baǵdarlarınan birine aylandı. Ásirese, Qaraqalpaqstan Respublikasın sociallıq-ekonomikalıq rawajlandırıwǵa qaratılǵan Prezident qarar hám pármanları xalıq turmısında áhmietli ózgerislerge tiykar jaratpaqta.
Ózbekstan Respublikası Prezidentiniń 2026-jıl 21-fevraldaǵı “Qaraqalpaqstan Respublikasın 2026-jılı sociallıq-ekonomikalıq rawajlandırıw hám keyingi jıllarǵa mólsherlengen baǵdarlamalardı tastıyıqlaw haqqında”ǵı qararı da mine usınday iygilikli maqsetlerdi izbe-iz dawam ettiriwge xızmet etetuǵın áhmiyetli hújjet boldı. Bul qarar Kegeyli rayonı xalqı tárepinen úlken qanaatlanıwshılıq penen kútip alındı. Sebebi qarar tiykarında rayonda xalıq ushın áhmietli bolǵan bir qatar mashqalalardı sheshiwge qaratılǵan keń kólemli ámeliy jumıslar belgilengen.
Bárinen burın, ishimlik suwı támiynatı tarawındaǵı mashqalalarǵa itibar qaratılıp atırǵanı áhmietli. Uzaq jıllar dawamında ayırım máhállelerde taza ishimlik suwınıń jetispewshiligi, eskirgen tarmaqlar sebepli suw basımınıń tómenligi xalıqtı qıynap kiyatırǵan edi. Endi bolsa rayon boyınsha 234 kilometr suw tarmaqların tartıw, 6 qudıq qazıw hám 4 ishimlik suwı obektin qurıw jumısları ámelge asırıladı. Bul jumıslar ushın 56 milliard 197 million sum qarjı ajıratılıwı belgilengen. Nátiyjede, xalıqtıń oraylasqan ishimlik suwı menen támiyinleniw dárejesi jáne de jaqsılanıp, suw tamtarıslıǵı menen baylanıslı mashqalalar basqıshpa-basqısh saplastırıladı.
Sonday-aq, rayon aymaǵında 67 kilometr ishimlik hám aqaba suw tarmaqların tartıw jáne 7 suw obektin jańadan qurıw hám rekonstrukciyalaw ushın 27 milliard sum qarjı ajıratılatuǵını belgilengeni de úlken áhmietke ie. Burın aqaba suw sistemasınıń jeterli emesligi sanitariyalıq jaǵdayǵa unamsız tásir kórsetken bolsa, endi bul jumıslar xalıqtıń salamatlıǵın hám ekologiyalıq turaqlılıqtı támiyinlewge xızmet etedi.
Jol infrastrukturasın jaqsılaw da tiykarǵı wazıypalardan biri etip belgilengen. Rayon aymaǵındaǵı 20 kilometr avtomobil jolların ońlaw ushın 28 milliard sum qarjı qaratılıwı rejelestirilgen. Bul bolsa xalıqtıń qatnawı ushın qolaylıq jaratıp, transport háreketin qáwipsiz hám jedel etiwge xızmet etedi.
Ásirese, Nókis-Taxtakópir xalıqaralıq áhmietke ie avtomobil jolınıń rayon aymaǵınan ótiwshi 22 kilometr bóleginiń ońlanıwı áhmietli joybarlardan biri bolıp esaplanadı. Bul jumıslar ushın 30 milliard 300 million sum qarjı ajıratılıwı belgilengen. Aldın bul jolda háreketleniwde júzege kelgen qolaysızlıqlar, transport qurallarınıń artıqsha waqıt hám qárejet jumsalıwı sıyaqlı mashqalalar ońlaw jumıslarınan keyin bir qansha qısqaradı.
Awıl xalqınıń eń kóp múrájatlarınan biri bolǵan elektr támiynatın jaqsılaw baǵdarında da salmaqlı jumıslar rejelestirilgen. Bul maqset ushın 13 milliard 173 million sum qarjı ajıratılıp, 53 kilometr elektr tarmaqları tartıladı hám 12 transformator punkti ornatıladı. Bul jumıslar nátiyjesinde elektr kúshleniwiniń tómenlewi, úzilisler hám quwat jetispewshiligi sıyaqlı mashqalalar sezilerli dárejede azayadı.
Suw xojalıǵı tarawında da ámeliy jumıslar dawam ettirilmekte. Aldın “Jılan-jap” kanalınıń 1 kilometri betonlastırılǵan bolsa, endi usı qarar tiykarında kanaldıń jáne 14 kilometrin betonlaw jumısları ámelge asırıladı. Bul jumıslar ushın 8 milliard sum qarjı ajıratılmaqta. Nátiyjede, suwdıń ısırap bolıwı azayıp, qıytaq jerlerge suw jetkerip beriw imkaniyatları keńeedi. Bul bolsa awıl xalqınıń dáramat dáreklerin arttırıwǵa da xızmet etedi.
Bilimlendiriw hám sport tarawlarında da áhmietli joybarlar ámelge asırıladı. Sonıń ishinde, 19-sanlı mektep imaratın ońlaw, Xalqabad aymaǵında jańa muzıka mektebin qurıw hám “Baxıtlı” MPJ aymaǵındaǵı sport mektebi filialı imaratın ońlaw jumısları ushın 14 milliard 600 million sum qarjı ajıratılıwı belgilengen. Bul bolsa jaslardıń bilim alıwı, kórkem óner hám sport penen shuǵıllanıwı ushın zamanagóy sharayatlar jaratadı.
Prezident qararında sanaat tarawın rawajlandırıwǵa da ayrıqsha itibar qaratılǵan. Rayonda boyaw tamırların qayta islew, qurılıs materialların islep shıǵarıw hám toqımashılıq baǵdarların rawajlandırıw boyınsha jańa imkaniyatlar jaratıladı. Bul bolsa jańa jumıs orınlarınıń shólkemlestiriliwine hám xalıqtıń bántligin támiyinlewge xızmet etedi.
Sonıń menen birge, Nókis-Taxtakópir avtomobil jolı boylap keminde 60 xızmet kórsetiw shaqapshaların shólkemlestiriw ushın jer maydanların anıqlaw hám aukcion sawdalarına shıǵarıw jumısları ámelge asırıladı. Nátiyjede jańa isbilermenlik subektleri payda bolıp, xalıqqa xızmet kórsetiw sapası artadı hám qosımsha jumıs orınları jaratıladı.
Eń áhmiyetlisi, bul joybarlardıń barlıǵı xalıqtıń kóp jıllıq mashqalaların sheshiw, turmıs abadanlıǵın arttırıw hám aymaqtıń kórinisin túp-tiykarınan ózgertiwge qaratılǵanı menen áhmietli. Álbette, belgilengen wazıypalardıń óz waqtında hám sapalı orınlanıwında Xalıq deputatları rayonlıq Keńesi deputatlarınıń qadaǵalawı hám belsene qatnasıwı áhmietli orın ieleydi.
Búgin Kegeyli rayonında ámelge asırılıp atırǵan keń kólemli dóretiwshilik jumısları “Insan qádiri ushın” principi ámelde óz kórinisin tawıp atırǵanınıń jáne bir ayqın kórinisi bolıp tabıladı.
Bayram ISKENDEROV,
Xalıq deputatları Kegeyli rayonlıq Keńesi sekretariatınıń baslıǵı.
