Búgingi kúnde elimizde jaslardıń bilim alıwı, kásip-óner ielewi hám óz biznesin jolǵa qoyıwı ushın keń imkaniyatlar jaratılmaqta. Usı sharayatlardan nátiyjeli paydalanıp, bilimlendiriw hám isbilermenlikti tabıslı úylestirip atırǵan jaslar qatarında Ájiniyaz atındaǵı Nókis mámleketlik pedagogikalıq institutı Mektepke shekemgi hám baslawısh bilimlendiriw fakultetiniń “Arnawlı pedagogika: logopediya” baǵdarınıń 3-basqısh studenti Zebiniso Tairova da bar.

Joqarı bilimlendiriw, ilim hám innovaciyalar ministrligi janındaǵı Student hám oqıwshılardıń sociallıq belsendiligin arttırıw orayı tárepinen ótkerilgen “Jıldıń eń belsendi studenti – 2025” respublikalıq tańlawınıń final basqıshında Zebiniso Tairova “Jıldıń eń belsendi isbilermen studenti” nominaciyasında tabıslı qatnasıp, óziniń intakerligi, miynet súygishligi hám isbilermenlik potencialın jáne bir márte kórsetti. Sebebi studentlik dáwiri kópshilik ushın tek bilim alıw procesi bolsa, Zebiniso bul dáwirdi jámietke payda keltiretuǵın baslamalardı ámelge asırıw imkaniyatı sıpatında qabıl etti.

Ol Xojeli rayonında Zebiniso shańaraqlıq jeke menshik mektepke shekemgi bilimlendiriw shólkemin shólkemlestirip, bir neshe jıldan berli usı mákemeniń jumısın nátiyjeli basqarıp kelmekte. Mákemede tárbiyalanıwshılar ushın zamanagóy tálim-tárbiya ortalıǵı jaratılǵan bolıp, olardıń dáslepki bilim hám kónlikpelerdi ielewine ayrıqsha itibar qaratılǵan.

Bizge belgili, mektepke shekemgi bilimlendiriw insan kamalǵa keliwiniń dáslepki tiykarı bolıp esaplanadı. Hár qanday ullı maqsetler hám joqarı nátiyjeler balalıqta qoyılǵan bekkem tiykarlarǵa súenedi. Zebiniso Tairova mine usı haqıyqattı tereń ańlaǵan halda óz jumısın jas áwladtıń tárbiyası menen baylanıstırdı.

Isbilermenlik hám studentlikti bir waqıttıń ózinde alıp barıw ańsat emes. Bir tárepten sabaq shınıǵıwları, ámeliy jumıslar hám óz betinshe bilim alıw, ekinshi tárepten bolsa mekemeni basqarıw, tárbiyalıq processlerdi shólkemlestiriw hám ata-analar menen birge islesiw úlken juwapkershilikti talap etedi. Biraq qaharmanımız óziniń miynet súygishligi hám tártibi sebepli bul wazıypalardıń barlıǵın tabıslı orınlap kelmekte.

Ásirese, onıń logopediya baǵdarında bilim alıp atırǵanı mektepke shekemgi bilimlendiriw tarawındaǵı jumısı menen únles bolıp ketkeni itibarǵa ılayıq. Ol keleshekte sóylewinde nuqsanı bolǵan balalar menen islesiw, olardıń jámiette múnásip orın ielewine úles qosıw maqsetinde teoriyalıq bilimlerin ámeliyat penen bayıtıp barmaqta.

– Keleshekte baslaǵan jumısımdı jáne de keńeytiwdi niet etkenmen, – deydi Zebiniso. – Sonday-aq, logopediya tarawında tereń bilim hám tájiriybe toplap, sóylewinde nuqsanı bolǵan balalar ushın arnawlı rawajlandırıwshı oraylar ashıw, olardıń jámietke beyimlesiwi hám bilim alıwına járdemlesiw tiykarǵı maqsetlerimnen biri bolıp esaplanadı.

Onıń atap ótiwinshe, hár bir balaǵa berilgen itibar keleshekte jámiettiń rawajlanıwına xızmet etedi.

Haqıyqatında da, maqsetke umtılıw, miynetten qashpaw hám óz ústinde turaqlı islew insandı joqarı sheklerge alıp shıǵadı.

Zebiniso Tairovanıń tańlawdaǵı tabıslı qatnasıwı bul “ármannan isbilermenlikke” jolındaǵı áhmietli qádem bolıp, onıń keleshekte jáne de úlken tabıslarǵa erisiwi ushın bekkem tiykar jaratatuǵını sózsiz.

Aziza ABDULLAEVA,

Qaraqalpaq mámleketlik universiteti Ózbek filologiyası baǵdarı 3-kurs studenti.