Hár bir jastıń ómirinde umıtılmas kúnler boladı. Men ushın Ózbekstan Respublikası Prezidentiniń qararı menen “Mard óǵlon” mámleketlik sıylıǵına múnásip dep tabılǵanım mine usınday baxıtlı hám juwapkershilikli waqıyalardan biri boldı. Bul joqarı tán alıwdı bárinen burın elimizde jaslarǵa qaratılıp atırǵan joqarı itibar hám isenimniń jáne bir ayqın kórinisi, dep bilemen. Jaslar kúni aldınan bunday sıylıqqa miyasar bolıw maǵan sheksiz maqtanısh baǵıshladı. Usı pursattan paydalanıp, Prezidentimizge biz jaslarǵa jaratıp atırǵan keń imkaniyatlar, turaqlı ǵamqorlıq hám joqarı isenimi ushın shın kewilden minnetdarshılıq bildiremen. Búgin Jańa Ózbekstanda jaslar ushın barlıq tarawlarda úlken imkaniyatlar jaratılmaqta. Jaslardıń bilim alıwı, kásip-óner ielewi, isbilermenlik penen shuǵıllanıwı, sport hám mádeniyat tarawlarında óz qábiletin kórsetiwi ushın bekkem sistema qáliplestirildi. Bul itibar hár bir jastı jáne de belsendi, intaker hám Watan táǵdirine baylanıslı bolıp jasawǵa shaqıradı. Men 2022-jıldan berli Tórtkúl rayonı Ullıbaǵ awıl puqaralar jıyınında jaslar jetekshisi sıpatında jumıs alıp barıp atırman. Ótken jıllar dawamında máhállemiz jaslarınıń bántligin támiyinlew, olardıń bos waqtın mazmunlı shólkemlestiriw, sportqa, kitapqumarlıqqa hám isbilermenlikke tartıw, sociallıq qorǵawǵa mútáj jaslar menen mánzilli islesiwdi ózim ushın eń tiykarǵı wazıypa dep bildim. Bul miynetlerimiz belgili nátiyjelerdi berdi. Máhálle jaslarınıń qatnasıwında “Bes baslama olimpiadası” sheńberinde respublika kóleminde joqarı nátiyjelerge erisildi. Futbol boyınsha MQX baslıǵı kubogi jarıslarında bir neshe márte jeńimpazlıq hám sıylı orınlar qolǵa kirgizildi. “Jıldıń eń úlgili máhálle jaslar jetekshisi” respublikalıq tańlawında birinshi orındı ielew hám mámleket boyınsha TOP-100 eń jaqsı jaslar jetekshileri qatarınan orın alıw men ushın úlken xoshamet boldı. Eń áhmietlisi, bul jetiskenlikler artında júzlegen jaslardıń arzıw-nietleri, isenimi hám háreketi jámlengen. Men hár bir jetiskenligimdi ustazlarım, kásipleslerim, máhálle belsendileri hám meniń menen iyinles bolıp miynet etip atırǵan jaslar menen baylanıstıraman. Sebebi hár qanday nátiyje tilekleslik, awızbirshilik hám óz-ara isenimniń jemisi bolıp esaplanadı. “Mard óǵlon” mámleketlik sıylıǵı men ushın tek ǵana joqarı tán alıw emes, al jáne de úlken juwapkershilik bolıp esaplanadı. Bul isenimdi aqlaw ushın keleshekte de jaslardıń bántligin támiyinlew, olardı sport hám isbilermenlikke keńnen tartıw, “Jaslar dápteri” menen islesiw nátiyjeliligin bunnan bılay da arttırıw, huqıqbuzarlıq hám túrli unamsız illetlerdiń aldın alıw baǵdarındaǵı jumısımdı jańa basqıshqa alıp shıǵıwdı óz aldıma maqset etip qoyǵanman. Prezidentimizdiń basshılıǵında ámelge asırılıp atırǵan reformalarda belsene qatnasıw, Watanımızdıń rawajlanıwına múnásip úles qosıw hár bir jastıń muqaddes minneti ekenine isenemen. Bizge bildirilgen joqarı isenimdi hadal miynet, watansúyiwshilik hám anıq ámeliy jumıslar menen aqlawǵa bárqulla tayarmız. Jaslarǵa isengen mámlekettiń keleshegi álbette ullı boladı. Mine, usı isenimge múnásip bolıw men ushın eń ullı maqset bolıp tabıladı. Nodirbek ALIMBAEV Turǵun ulı, “Mard óǵlon” mámleketlik sıylıǵınıń laureatı.