Elimizde medicina tarawın reformalaw, xalıqqa sapalı medicinalıq xızmet kórsetiw, sistemanı sanlastırıw, tarawǵa zamanagóy texnologiyalardı engiziw baǵdarında keń kólemli jumıslar ámelge asırılmaqta.

Jaqında Xojeli rayonında “Xojeli eli” sanatoriyası óz jumısın basladı. Ilajdıń ashılıw máresiminde medicina xızmetkerleri hám keń jámiechilik wákilleri qatnastı.

Atap ótilgenindey, búgingi kúnde elimizde xalıqqa maman hám sapalı medicinalıq xızmet kórsetiw, jeke menshik sektordıń qatnasın keńeytiw, sistemanı bunnan bılay da jetilistiriw baǵdarındaǵı jumıslar jańa basqıshqa kóterildi. “Xojeli” sanatoriyası da mine usınday imkaniyatlardıń nátiyjesi sıpatında xalıqqa sapalı medicinalıq xızmet kórsetedi.

Rayonlıq medicina birlespesine qaraslı bul sanatoriya búgingi kúnde 40 orınǵa mólsherlengen bolıp, bul jerde barlıq qolaylıqlar jaratılǵan.

– Búgingi kúnde elimizde medicina tarawın bunnan bılay da rawajlandırıw, xalıqqa sapalı hám zamanagóy medicinalıq xızmet kórsetiw baǵdarında izbe-iz jumıslar ámelge asırılmaqta, – deydi tájiriybeli shıpaker Náwbáhár Tursınbaeva. – Bul bolsa bárinen burın adamlarımızdıń abadan turmısı, salamat turmıs keshiriwi, kórsetilip atırǵan medicinalıq xızmetten razı bolıwın támiyinlew menen birge zamanagóy hám qolaylı sharayatlardan paydalanıw imkaniyatın arttıradı. “Xoja-eli” sanatoriyasınıń ashılıwı da rayonımız turǵınları ushın úlken jańalıq boldı. Adamlarımızdıń óz densawlıǵın tiklewi, emleniwi, dem alıwı ushın bul jerde barlıq sharayatlar jaratılǵan. Eń sońǵı zamanagóy úskeneler menen támiyinlengen. Nawqaslarımız ushın jeńillikler de jaratılǵan. Máselen, bir noqatqa massaj alıwı, EKG tekseriwi, Ózi tekseriwi biypul, bes kún emlense jáne bir kún qosımsha dem alıwı múmkin.

– Respublikamızda adamlarımızdıń salamatlıǵın tiklew, dem alıwı, emleniwi ushın klinika hám sanatoriyalar oǵada kóp, – deydi xojelilik Sanobar Madaminova. – Endi bunday zamanagóy sanatoriya rayonımızda da jumıs baslaǵanı biz ushın oǵada quwanıshlı waqıya boldı. Sebebi xalıq uzaq jerlerge barıp júrmeydi. Bul jerde qánigeli xızmetten biymálel paydalanıwı múmkin.

Haqıyqatında da, elimizde medicina tarawındaǵı reformalar bárinen burın adamlarımızdıń salamat hám abadan turmısın támiyinlewge qaratılǵanı menen áhmietli.

F.NURULLAEVA.