Búgingi kúnde elimizde jaslardıń óz talantın kórsetiwi, sportta joqarı sheklerge erisiwi menen birge, jámietlik turmısta belsene qatnasıwı ushın keń imkaniyatlar jaratılmaqta. Mine, usınday talantlı, umtılıwshań hám belsendi jaslarımızdan biri – kórkem gimnastika boyınsha xalıqaralıq kategoriyadaǵı sport sheberi, Jáhán kubogi sıylıǵınıń iesi, Ózbekstan mámleketlik denetárbiya hám sport universiteti Nókis filialınıń 2-kurs studenti Samira Axmedova bolıp tabıladı.

Samira balalıǵınan sportqa mehir qoyǵan. Ol altı jasınan kórkem gimnastika menen turaqlı shuǵıllanıp, aldına qoyǵan maqsetlerine qaray umtıldı. Tınımsız shınıǵıwlar, erk-ıqrar, sabır-taqat hám óz ústinde turaqlı islew nátiyjesinde jas sporchı búgingi kúnde úlken jetiskenliklerge eristi.

Samiranıń sporttaǵı tabısları, bárinen burın, onıń miynet súygishligi hám isenimliliginen dárek beredi. Ol xalıqaralıq kategoriyadaǵı sport ustası ataǵına miyasar boldı. Jáhán kubogi jeńimpazı hám búgingi kúnde Ózbekstan saylandı komandası quramında xalıqaralıq jarıslarda elimizdiń abırayın múnásip qorǵap kelmekte.

Samira Axmedovanıń ómiri tek sport penen sheklenip qalmaydı. Ol Ózbekstan Ekologiyalıq partiyasınıń belsendi aǵzası sıpatında ekologiyalıq-aǵartıwshılıq ilajlar menen akciyalarda da belsene qatnasıp kelmekte. Ásirese, ol jaslar arasında tábiyatqa mehir-muhabbat, ekologiyalıq mádeniyat hám qorshaǵan ortalıqqa juwapkershilikli qatnastı qáliplestiriwge qaratılǵan baslamalarda júdá belsendi.

Samira “20-sentyabr – Pútkiljáhán tazalıq kúni,” “30-mart – Shıǵındısız dúnya ushın xalıqaralıq kúni,” “5-may – Sayǵaqlardı qorǵaw kúni” múnásibeti menen shólkemlestirilgen ekologiyalıq akciyalarda belsene qatnastı.

Sonday-aq, jaslardı tábiyattı saqlawǵa shaqıratuǵın “Tábiyat ushın birleseyik!” súreni astındaǵı ilajlarda da óziniń belsendi puqaralıq poziciyasın kórsetti.

Sport hám salamatlıq máselelerine baǵıshlanǵan ilajlar da onıń itibarınan shette qalmaydı.

Jas sporchınıń bunday jumısı múnásip tán alınıp, ol Ózbekstan Ekologiyalıq partiyası Qaraqalpaqstan Respublikası partiya shólkemi tárepinen húrmet jarlıǵı hám bir qatar minnetdarshılıq xatları menen sıylıqlanǵan.

Negizinde, haqıyqıy jetiskenlik tek ǵana medal hám sıylıqlar menen ólshenbeydi. Insannıń jámiet aldındaǵı juwapkershiligi, el-jurtqa payda keltiriwge umtılıwı, tábiyat hám keleshek áwlad táǵdirine biypárwa bolmawı da úlken pazıylet bolıp esaplanadı. Samira Axmedova mine usı tárepleri menen zamanlasları arasında ayrıqsha ajıralıp turadı.

Ol sport maydanlarında Watanımız bayraǵın bálent kóteriwge umtılar eken, jámietlik turmısta da belsendi bolıp, ekologiyalıq ideyalardı jaslar arasında úgit-násiyatlamaqta. Bul bolsa sporchı jaslardıń tek ǵana fizikalıq jaqtan shınıqqan emes, al ruwxıy bárkamal, sociallıq juwapkershilikli bolıwı zárúr ekenligin jáne bir márte tastıyıqlaydı.

Búgin Samira sıyaqlı jaslar – Jańa Ózbekstannıń úlken úmiti hám isenimi bolıp esaplanadı. Olardıń jetiskenlikleri jas áwladqa kúsh-ǵayrat, isenim baǵıshlaydı. Sebebi úlken maqsetke umtılǵan, óz ústinde tınımsız isleytuǵın hám jámietlik turmısqa biypárwa bolmaǵan jaslar keleshek rawajlanıwınıń bekkem tayanıshı bolıp esaplanadı.

Sporttaǵı jeńisler hám tábiyattı saqlaw jolındaǵı iygilikli baslamalar – Samira Axmedovanıń búgingi jumısın birlestirip turǵan eki áhmietli baǵdar bolıp esaplanadı. Bul qábiletli jas sporchı keleshekte de xalıqaralıq maydanlarda elimizdiń abırayın múnásip qorǵap, jámiet hám ekologiya jolındaǵı jumısın dawam ettiredi, dep isenemiz.

Óz xabarshımızdan.