Prezidentimizdiń usı jıl 18-19-sentyabr kúnleri Qaraqalpaqstanǵa etken saparı aymaqtıń rawajlanıwında jańa basqıshtı baslap berdi, desek qáte bolmaydı. Sapar sheńberinde juwapker basshılardan baslap, el táǵdirine biypárwa bolmaǵan hár bir qaraqalpaqstanlı ushın, aymaqtıń búgingi rawajlanıwı, bar imkaniyatlardan nátiyjeli paydalanıw hám xalıqtıń abadanlıǵın jáne de arttırıwǵa qaratılǵan tiykarǵı wazıypalar belgilep berildi.

Haqıyqatında da, búgin Qaraqalpaqstanda túrli baǵdarlarda ámelge asırılıp atırǵan jańa joybarlar, qala hám awıllardaǵı qurılıs-dóretiwshilik jumısları Aralboyı xalqınıń birlesip, tınısh-tatıw, abadan turmıs keshiriwine tiykar jaratpaqta.

Máhálle hám awıllarda xalıq ushın qolaylı infrastrukturanıń jaratılıp atırǵanı, Jańa Ózbekstan kórinisindegi máhállelerdiń sanınıń artıp baratırǵanı, jaslardıń sapalı bilim alıwına qaratılıp atırǵan itibar hám ǵamqorlıq kewillerge quwanısh, turmıstan razılıq, shúkirshilik sezimlerin alıp kirmekte.

Sapar etiw sheńberinde bahası 592 million dollar bolǵan 11 joybar paydalanıwǵa tapsırılıp, sırt elli birge islesiwshilerdiń qatnasıwında 7 milliard dollarlıq 47 jańa joybardıń ámelge asırılıwına start berilgeni Qaraqalpaqstannıń jedel rawajlanıwına taslanǵan qádem boldı.

Tiykarǵısı, bul joybarlar esabınan 8 mıń jańa jumıs ornı jaratılıwı belgilengen.

Xalıqtıń abadanlıǵın arttırıw hám investorlar ushın qolaylı, tartımlı investiciyalıq ortalıq jaratıwda, energetika tarawındaǵı joybarlardıń áhmieti úlken.

Qońırat rayonında quwatlılıǵı 1,5 mıń megavatt bolǵan samal elektr stanciyasın qurıw, jańa elektr tarmaqları hám podstanciyalar qurıw rejeleri aymaqtıń energetikalıq potencialın bunnan bılay da arttırıwǵa xızmet etetuǵını menen áhmietli bolıp esaplanadı.

2030-jılǵa shekem “jasıl” energiya úlesin 76 procentke jetkeriw maqseti belgilep alınǵanlıǵı, aymaqtıń ishki hám tábiyǵıy imkaniyatlarınan nátiyjeli paydalanıwǵa shaqıradı.

Húrmetli Prezidentimizdiń xalıq wákilleri, jámiechilik belsendileri menen ótkerilgen sóylesiwinde xalıqtıń bántligin hám dáramatların arttırıw, isbilermenlikti rawajlandırıw, máhállelerde múnásip jasaw sharayatların jaratıw máselelerine ayrıqsha itibar qaratıldı.

Medicina tarawında Nókis medicina ilimiy akademiyası, Balalar klinikası, Onkologiya orayı hám jańa kóp tarmaqlı emlewxananı birlestirgen Universitet medicinalıq klasterin shólkemlestiriw rejesi Qaraqalpaqstanda zamanagóy medicinalıq xızmetlerdiń sapasın arttırıwǵa qaratılǵan áhmietli wazıypalardan biri bolıp esaplanadı.

Búgingi miynet bazarında zamanagóy kásip hám kónlikpelerge ie qánigelerge talap barǵan sayın artıp atırǵan bir sharayatta bilimlendiriwdi jumıs beriwshilerdiń talapları menen úylestiriw boyınsha da wazıypalar belgilep alındı. Bul óz gezeginde jumıssızlıqtıń aldın alıwǵa, xalıqtıń dáramatların arttırıwǵa xızmet etedi.

Jáne bir áhmietli baǵdar – Qaraqalpaqstannıń bay tariyxıy hám ruwxıy miyrasın qásterlep saqlaw hám onı jas áwladqa jetkeriw.

Kelesi jılı ullı qaraqalpaq shayırı hám oyshılı Berdaq Qarǵabay ulı tuwılǵanınıń 200 jıllıǵın múnásip belgilew boyınsha bildirilgen baslama milliy ádebiyat, mádeniyat hám ruwxıy miyrasqa itibardıń ámeliy kórinisi bolıp esaplanadı.

Partiyamız belsendileri hám deputatları hár bir máhálle hám shańaraqqa kirip, húrmetli Prezidentimizdiń basshılıǵında ámelge asırılıp atırǵan reformalardıń nátiyjesi hám perspektivalı rejelerdi xalqımızǵa qızǵın sóylesiwler arqalı jetkeriwdi óz minneti dep biledi. Sebebi, elimizde alıp barılıp atırǵan barlıq jańalanıwlardıń bas maqseti bolǵan “insan qádiri” ideyasınıń mazmun-mánisin hár bir watanlasımızdıń qálbine shın kewilden sińdiriw búgin bizden joqarı juwapkershilik talap etpekte.

R.OTARBAEV,

Ózbekistan “Adolat” SDP Qaraqalpaqstan Respublikası Keńesi baslıǵınıń orınbasarı.