Prezidentimizdiń Qaraqalpaqstanǵa, sonıń ishinde, “Turan” stadionına keliwi biz sporchılardı, trenerlerdi, qalaberdi, bul jerde tárbiyalanıp atırǵan jas futbolshılardı sheksiz quwandırdı. Negizinde, Prezidentimizdiń hár bir saparı Qaraqalpaqstan tariyxında, usı jerde jasap miynet etip atırǵan watanlaslarımızdıń turmısında jańa bet ashıp, úlken maqsetler jolında ruwxlandıradı.

Búgin tek ǵana sport tarawında emes, al, elimizdiń eń shetki aymaqlarında da jańalanıw hám ózgerisler, abatlıq hám dóretiwshilik jumısları keń kólemde alıp barılmaqta.

Prezidentimiz sapar sheńberinde “Turan” stadionınıń imkaniyatları, bul jerde jaratılǵan sharayatlar menen jaqınnan tanıstı, futbolshılarımız benen ushırastı. Hár biri menen óz aldına qol berip kóristi. Men oylayman, bul futbolshılarımız ushın tek ǵana ushırasıw emes, al, keleshektegi arzıw-nietlerine, nátiyjeli jumısına ashılǵan keń jol, imkaniyat bolıp esaplanadı.

Sóylesiw dawamında infrastruktura jaratıp berdik, biraq, ádil hám sapalı selekciya tiykarǵı másele bolıwı kerek, talantlar máhálle, awıl hám mekteplerde qalıp ketpewi kerek, dep atap ótti Prezidentimiz. Bul álbette, biz taraw wákilleri-trenerler ushın jumısımızdı jáne de nátiyjeli shólkemlestiriw, hár bir jasqa ayrıqsha itibar qaratıwımız hám bar imkaniyatlarımızdı iske qosıwımız zárúrligin bildiredi.

Uzaq jıllıq jumısım dawamında Qaraqalpaqstan futbolı, “Aral” komandasınıń keshe hám búgini haqqında azlı-kópli xabardarman. Durıs, ótken jıllar dawamında sistemada qıyınshılıqlar, sheshimin kútip turǵan mashqalalar menen birge jeńisli máwritler de boldı. Biraq, búgin Qaraqalpaqstan futbolı túp-tiykarınan jańalanbaqta. Sistemanıń materiallıq-texnikalıq bazası jaqsılandı.

Prezidentimizdiń Qaraqalpaqstanǵa bolǵan ayrıqsha itibarı hám ǵamxorlıǵı, sheksiz mehiri sebepli Ǵárezsizligimizdiń 35 jıllıq dańqlı bayramı aldınan “Turan” stadionı 118,6 milliard sum qarjı esabınan qayta rekonstrukciyalanıp, paydalanıwǵa tapsırıldı.

Búgingi kúnde bul jerde tiykarǵı futbol maydanına qosımsha 2 futbol maydanshası, 196 orınlıq jataqxana, zamanagóy oqıw xanaları, asxana, kitapxana, fitnes hám sport zalları, xalıqqa xızmet kórsetiw orınları, avtomashinalar ushın turıw orınları bar. Nátiyjede stadion futbolǵa qánigelestirilgen sport kompleksine aylandırıldı.

Stadionnıń jáhán standartlarına sáykes keliwi bul jerde oynap atırǵan “Aral,” “QMU-Jayhun,” “Aral akademiya” hám “Aral women” qızlar komandaları ushın jańa imkaniyatlar esigin ashpaqta.

Sonı da qanaatlanıwshılıq penen atap ótiwdi qáler edim, jaqında stadionǵa zamanagóy VAR texnologiyası ornatıldı.

Bul futbol oyınların zamanagóy talaplar tiykarında ótkeriwde tóreshilerdiń qararların videojazıw arqalı qayta kórip shıǵıw imkaniyatın beredi.

Sonday-aq, futbolshılarımızǵa Prezidentimizdiń sawǵası – zamanagóy avtobus berildi.

Mámleketimiz basshısı tárepinen futbolshılarımızǵa jaratıp berilip atırǵan bunday imkaniyatlar bizge úlken kúsh-ǵayrat baǵıshlap, juwapkershiligimizdi jáne de arttıradı.

Keleshekte futbolshılarımız arasınan Ózbekstan, Jáhán chempionların jetistirip, elimiz bayraǵınıń bálentlerde jelbirewine óz úlesimizdi qosamız. Prezidentimizdiń saparı, búgin “Turan” stadionındaǵı jańalanıw hám imkaniyatlar mine usınday ullı maqsetlerge tiykar jaratpaqta.

Damir Iskenderov,

Qaraqalpaqstan futbolı akademiyası direktorı.