Prezidentimizdiń Qaraqalpaqstan Respublikasına saparı aymaqlardıń ekonomikasın rawajlandırıw jáne xalıqtıń bántligin támiyinlew hám shańaraqlardıń dáramatın arttırıwǵa qaratılǵan reformalardıń ámeliy nátiyjesin jáne bir márte kórsetti.

Mámleketimiz basshısı Shavkat Mirziyoev Kámbaǵallıqtı qısqartıw hám bántlik ministrliginiń baslaması menen Kegeyli rayonında qurılǵan ıssıxana kompleksiniń jumısı menen tanıstı.

Joybar sheńberinde 12,5 milliard sum jeńilletilgen qarjı qaratılıp, 5 gektar maydanda zamanagóy, jeńil konstrukciyalı ıssıxana shólkemlestirildi. Nátiyjede “Sociallıq reestr”de turǵan 50 járdemge mútáj shańaraq turaqlı jumıs ornı menen támiyinlendi. Bir shańaraqqa 10 sotixtan ıssıxana maydanı ajıratıp berildi.

Komplekske biriktirilgen jetekshi isbilermen shańaraqlarǵa tek ǵana jer hám ıssıxana ajıratıp qoymastan, al olardı 2 jıl dawamında usı jerdiń ózinde ámeliyatqa úyretedi. Xalıq jeterli bilim hám tájiriybe toplaǵannan soń, óz qıytaq jerlerinde ıssıxana shólkemlestiriwge járdemlesedi. Eń áhmietlisi, jetistirilgen awıl xojalıǵı ónimleri jetekshi isbilermen tárepinen bazar bahasında kepillikli satıp alınadı.

Bunnan tısqarı, komplekste jılına 1 mıń puqaranı ıssıxana xojalıǵı hám diyqanshılıq baǵdarında oqıtıw sisteması jolǵa qoyılǵan.

Xalıqtıń dáramatın jáne de arttırıw ushın qosımsha imkaniyatlar da jaratıldı. Íssıxana janındaǵı 350 metrlik kollektorda 500 bas úyrek baǵıwǵa mólsherlengen arnawlı imarat qurıldı. Joybar sheńberinde hár bir shańaraqqa Braziliyadan alıp kelingen 10 bastan “Favorit” násilli úyrekler ajıratılıp, olardı kóbeytiw texnologiyası úyretilmekte.

Sonday-aq, komplekste resurs únemlewshi texnologiyalar keńnen engizilgen: ornatılǵan 100 kilovatt quwatlılıqqa ie quyash panelleri ıssıxananıń kúnlik elektr energiyasına bolǵan talabın tolıq qaplaydı.

– Mámleketimiz basshısınıń rayonımızǵa saparınan basımız kókke jetti. Ásirese, ıssıxananıń jumısı menen jaqınnan tanısqanı bizge úlken juwapkershilik júkleydi, – deydi buxaralı isbilermen Akram Hojiev. – Bunnan 10-15 jıl burın bul jer hesh nárse egilmeytuǵın taslandı atız edi. Mámleketimiz basshısınıń baslaması menen búgin bul mánzil zamanagóy agrotexnikalıq qolaylıqlarǵa ie ıssıxanaǵa aylandı. 2026-jıldıń báhárinde dáslepki náller otırǵızıldı. Tiykarǵı maqsetimiz – kem támiyinlengen shańaraqlardı sociallıq qollap-quwatlaw hám olardıń dáramatın arttırıw bolıp tabıladı.

Keleshekte bul jerde pomidor, bolgar burıshı hám qulpinay sıyaqlı 5-6 túrdegi awıl xojalıǵı ónimlerin jetistiriw rejelestirilgen. Házirgi waqıtta ıssıxananıń tiykarǵı maydanında Qubla Koreyadan alıp kelingen, ónimdarlı hám bazarda ótimli “Fontino-F1” bodring sortı tárbiyalanbaqta.

– Bizge 10 sotix jer ajıratılıp, tuqım, nál hám barlıq zárúr ot-jemler jetkerip berildi, – deydi Saltanat Odilboeva. – Burın da úyde egin egetuǵın edim, biraq bul jerdegi sharayat pútkilley basqasha. Miynetkeshler ushın ıssı awqatqa shekem shólkemlestirilgen. Bul jerge egilgen qıyar sortı júdá tez ónim beredi – búgin terseńiz, erteń jáne pisip jetile beredi. Sır emes, usı ıssıxanadan alıp atırǵan dáramatım esabınan perzentimniń joqarı oqıw ornındaǵı kontrakt pulın tólep atırman. Jerge mehir berseńiz, ol hesh qashan sizdi ırısqısız qaldırmaydı eken. Kem támiyinlengen shańaraqlarǵa usınday imkaniyat jaratıp bergen mámleketimizden minnetdarmız.

Juwmaq ornında atap ótiw orınlı, Kegeyli rayonında ámelge asırılǵan bul kompleksli joybar awıllıq aymaqlarda isbilermenlikti rawajlandırıw hám kámbaǵallıqtı qısqartıwda eń nátiyjeli model ekenin kórsetedi. Ol tek ǵana jumıs ornın jaratıp qoymastan, “jetekshi isbilermen – shańaraq” shınjırı hám qayta tikleniwshi energiya dárekleri arqalı xalıqtı turaqlı, kepillikli hám turaqlı dáramat dáregi menen támiyinlewge xızmet etedi.

F.ABDURAIMOVA.