Bıyılǵı kásiplik bayramımız men ushın qos bayramlar hám quwanıshlı jetiskenliklerge bay boldı. Jaqında ǵana Prezidentimiz benen jáne bir márte júzbe-júz sóylesiw baxtına miyasar boldım. “Jıl muǵallimi” tańlawında qatnasıp, jeńimpaz boldım. Búgin bolsa Ózbekstan Respublikası Prezidentiniń Pármanı menen joqarı mámleketlik sıylıq – “Mardlik” ordeni menen sıylıqlandım.
Bul joqarı sıylıqtı úlken juwapkershilik penen qabıl etemen. Sebebi, ustazǵa bildirilgen isenim onı óz kásibine jáne de shın kewilden xızmet etiwge iytermeleydi.
Mámleketimiz basshısınıń Qaraqalpaqstanǵa saparı sheńberinde ótkerilgen sóylesiwde qatnasıp, bunnan eki jıl aldınǵı sáwbetimiz de yadıma tústi. Sonda da Prezidentimiz benen muǵallimlerdiń miyneti, olarǵa jaratılıp atırǵan sharayatlar hám miynet haqı haqqında pikirlesken edik.
Men sol sáwbette shetki aymaqta islewime qaramastan, 2 mıń dollar ekvivalentinde miynet haqı alıp atırǵanımdı aytqan edim. Prezidentimiz bolsa: “4 mıń dollar alsańız, razı bolaman,” degen edi.
Sol waqıtta bul gápti esitkenimde júregimde ayrıqsha bir sezim payda bolǵan. Sebebi, bul sózlerdiń ózi muǵallimniń miynetine mámleketimiz basshısı tárepinen qanday joqarı baha berilip atırǵanın ańlatatuǵın edi.
Búgin bolsa artqa qarap, sol sóylesiwde aytılǵan pikirlerdiń turmıstaǵı kórinisin kórip turman. Prezidentimiz muǵallimniń aylıq miynet haqısı 2 mıń dollar boladı, degeninde onsha isenim menen qaramaǵanlar da bolǵan. Búgin bolsa bul gápler haqıyqatqa aylandı.
Meniń ózim de jaratılǵan ádil xoshametlew sistemasınıń nátiyjesinde 2 mıń dollar ekvivalentinde miynet haqı alaman. Bıyıl bolsa “Jıl muǵallimi” tańlawında qatnasıp, jeńimpaz boldım. Bunıń ushın 616 million sum, yaǵnıy derlik 50 mıń dollar muǵdarında bir mártelik aqshalay sıylıqqa iye boldım.
Men ushın eń úlken quwanısh – óz miynetim nátiyjesin oqıwshılarımnıń jetiskenliklerinde kóriw. Pán olimpiadalarında jeńimpaz bolǵanım ushın Prezidentimizdiń tiyisli qararı tiykarında aylıǵıma 100 procent, respublikalıq olimpiada jeńimpazı sıpatında jáne 100 procent ústeme tólenedi. Ózbek tili boyınsha milliy sertifikattan A+ dárejesine iyemen hám onıń ushın 50 procent ústeme alaman. Sonday-aq, Ministr qorınan 70 procent, ilimiy jumıs ushın 30 procent, direktor qorınan da 30 procent ústeme beriledi.
Búgin mámleketimizde muǵallim ushın jaratılıp atırǵan imkaniyatlardı kórip, “Ne ushın men muǵallim boldım?” degen sorawǵa jáne de isenim menen juwap beremen. Sebebi ustazlıq – ápiwayı kásip emes. Bul eldiń keleshegine baylanıslı maqtanıshlı wazıypa.
Prezidentimizdiń muǵallimler haqqındaǵı pikirlerin hár saparı esitkenimde, ózimizdiń jetiskenliklerimiz haqqında oylayman. Kewlimnen mınaday pikir ótedi: sonsha imkaniyat, sonsha itibar hám húrmet sharayatında bunday nátiyjelerge erisiw hár bir muǵallim ushın ádettegi miynet tártibine aylanıwı kerek.
Men “Jıl muǵallimi” tańlawındaǵı jeńimpazlıǵımdı tek ǵana ózimniń jetiskenligim dep bilmeymen. Bul – maǵan isenim bildirgen mektebim jámááti, bilim bergen ustazlarım, bárqulla qollap-quwatlap kiyatırǵan jaqınlarım hám álbette, meniń menen birge izlenip atırǵan oqıwshılarımnıń da jetiskenligi.
Búgingi joqarı mámleketlik sıylıqtı da mine usı insanlar menen baylanıstıraman. Sebebi hár qanday nátiyje artında jámáátlik miynet, isenim hám qollap-quwatlaw turadı.
Bul tán alıw hám xoshametlew meni bunnan bılay da ózim ústinde islewge, izleniwge, oqıwshılarıma sapalı bilim beriwge hám ustaz degen ullı ataqqa múnásip bolıwǵa iytermeleydi. Búgin maǵan bildirilgen isenimdi erteńgi miynetim hám jańa nátiyjelerim menen aqlawdı óz aldıma maqset etip qoyǵanman.
N.ALLAMBERGENOVA,
Qanlıkól rayonındaǵı 2-sanlı ulıwma bilim beriw mektebiniń ózbek tili páni muǵallimi, “Mardlıq” ordeniniń iyesi.
