Muǵallimniń miyneti hámiyshe húrmette. Sebebi, millettiń erteńgi kúni, mámlekettiń rawajlanıwı, jámiettiń ruwxıy kelbeti kóp tárepleme búgin mektepte bilim alıp atırǵan jas áwladqa berilip atırǵan bilim hám tárbiyaǵa baylanıslı.
Muǵallimler hám ustazlar kúni múnásibeti menen Prezidentimizdiń Pármanına muwapıq, Ámiwdárya rayonındaǵı 36-sanlı ulıwma orta bilim beriw mektebiniń matematika páni muǵallimi Azimbay Saparbaevqa “Ózbekstan Respublikası xalıq oqıtıwshısı” húrmetli ataǵı berildi.
Azımbay Saparbaevtıń pedagogikalıq jumısına názer taslar ekenbiz, onıń eń úlken baylıǵı túrli ataq hám sıylıqlar emes, al shákirtleriniń erisken nátiyjeleri ekenin ańlaw qıyın emes.
Ustazdıń Ámiwdárya rayonındaǵı 56-sanlı ulıwma orta bilim beriw mektebinde islegen jılları da áne usınday jemisli nátiyjelerge bay boldı. 2018-2019-oqıw jılında B.Tolıbaev matematika páninen III basqısh “Pán olimpiadası”nda I orındı ielep, IV basqıshta da tabıslı qatnastı. S.Qadambaev bolsa II basqısh olimpiadasında matematika páninen I orındı qolǵa kirgizdi.
Usı jıldıń ózinde B.Twlibayev, J.Ismoilov, Z.Nurullaev, Sh.Ywldoshev, J.Ywldoshev hám S.Wrazboevlar joqarı bilimlendiriw mákemelerine mámleketlik grant hám tólemli-kontrakt tiykarında qabıl etildi.
2019-2020-oqıw jılında bolsa I.Fayzullaev hám S.Qadamboev matematika páninen olimpiadanıń II basqıshında eń joqarı – 100 ball toplap, III basqıshqa jollama aldı. I.Fayzullaev mektepti altın medal menen tamamlap, Tashkent mámleketlik ekonomika universitetine 185,9 ball menen mámleketlik grant tiykarında qabıl etildi.
Azimbay Saparbaev bilimlendiriwdegi jańalanıwlarǵa bárqulla qızıǵıwshılıq penen qatnas jasap kelgen. Mekteplerde variaciyalıq oqıw rejesi tiykarında shólkemlestirilgen X-XI klasslarda sabaq sabaqların birinshilerden bolıp baslaǵanı da onıń izleniwsheń pedagog ekenliginen dárek beredi.
Keyingi jıllarda da bul dástúr dawam etti. 2023-2024 hám 2024-2025-oqıw jıllarında bul kórsetkish 100 procentti quradı. 2025-2026-oqıw jılında bolsa ustaz sabaq berip atırǵan 11 “B” texnologiya baǵdarındaǵı variantlı klasstıń 25 pitkeriwshisiniń barlıǵı joqarı bilimlendiriw mákemelerine qabıl etildi. Olardıń 13 i grant, 12 si kontrakt tiykarında oqıwǵa kirdi. Shákirtlerinen biri Malayziyadaǵı “XIAMEN UNIVERSITY MALAYSIA” universitetine grant tiykarında qabıl etildi.
Búgin ustaz tálim bergen oqıwshılar arasında joqarı maǵlıwmatlı shákirtler sanı 1 900 ge jetken.
– Ustazlıq – turaqlı izleniwdi talap etedi, – deydi Azimbay Saparbaev. – Usı principten kelip shıǵıp, jıllar dawamında ilimiy-metodikalıq izleniwler alıp bardım. “Zamanagóy sabaqtı shólkemlestiriw metodikası,” “Trigonometriyalıq tenlemeler hám teńsizlikler sistemaları,” “Logarifmli tenlemelerdi sheshiwdiń qolaylı usılları,” “Abiturient ushin matematikadan test sorawları,” “Kvadrat funkciyalar grafigi,” “Oqıwshılarda logikalıq pikirlewde matematika pániniń orni” sıyaqlı 12 den artıq oqiw-metodikalıq qollanbalarım bilim beriw procesinde qollanılıp kelinbekte.
A.Saparbaevtıń pedagogikalıq jumısındaǵı miyneti bir qatar sıylıqlar menen tán alındı. 2015-jılı “Ózbekstan orta arnawlı kásip-óner bilimlendiriwi aǵlası,” 2016-jılı Ózbekstan Respublikası ǵárezsizliginiń 25 jıllıq kókirek belgisi, 2021-jılı “Qaraqalpaqstan Respublikası xalıq bilimlendiriwi aǵlası” hám “Ózbekstan Respublikası xalıq bilimlendiriwi aǵlası,” 2023-jılı “Ózbekstan Respublikası xalıq bilimlendiriwi pidayısı” kókirek belgileri menen sıylıqlandı.
2021-jılı “Qaraqalpaqstan Respublikasına miyneti sińgen xalıq bilimlendiriw xızmetkeri,” 2025-jılı bolsa “Qaraqalpaqstan Respublikası xalıq oqıtıwshısı” húrmetli ataqlarına ie boldı.
Endi “Ózbekstan Respublikası xalıq oqıtıwshısı” húrmetli ataǵı onıń miynet jolındaǵı jáne bir joqarı itibar boldı.
– Bul ataqtı úlken minnetdarshılıq hám juwapkershilik penen qabıl etemen. Maǵan bildirilgen joqarı isenimdi ózimniń jeke jetiskenligim emes, al meniń menen birge miynet etken kásipleslerime, qollap-quwatlaǵan ata-analar hám jıllar dawamında maǵan isengen shákirtlerime berilgen baha dep bilemen. Sebebi ustazdıń tabısı – shákirtiniń kamalı, – deydi ustaz.
Ustaz ushın shákirtleriniń kamalı – eń úlken baxıt, olardıń tabısı bolsa miynetiniń jemisi. Prezident Pármanı menen berilgen húrmetli ataqqa ie bolǵanı bolsa, mine, usı kóp jıllıq pidákerlik miynetke berilgen joqarı mámleketlik tán alınıwı bolıp esaplanadı.
Ǵ.ATAJANOV.
