Máhállelerde jumıs alıp barıp atırǵan “Jaslar jetekshisi” – jámlespegen hám járdemge mútáj jaslar menen sistemalı islesiw, olardıń mashqalaların mánzilli sheshiw, joybar hám baslamaların qollap-quwatlaw, bántligin támiyinlew, belsendi hám jigerli jaslardıń qatarın jáne de keńeytiwde úlken áhmietke ie bolmaqta.

Bul baǵdarda Qaraózek rayonı “Qutlı mákan” mákan puqaralar jıyınında da sistemalı jumıslar jolǵa qoyılǵan.

Búgingi kúnde máhállemizde 4 833 xalıq bolıp, sonnan 1200 den aslamın jaslar quraydı.

Prezidentimiz hár bir bayanatlarında, shıǵıp sóylewlerinde jaslar máselesine ayrıqsha itibar berip, olardı Watanımızdıń jarqın keleshegi, Jańa Ózbekstanımızdıń dóretiwshileri, qurıwshıları sıpatında tán aladı. Bul bolsa biz jaslardı ruwxlandırıw menen birge juwapkershiligimizdi jáne de arttıradı.

Máhállemizde usı jılı ótkerilgen xatlaw nátiyjelerine bola, 19 jas jumıssız ekeni anıqlandı hám tiyisli juwapker basshılarǵa biriktirildi. Nátiyjede búgingi kúnde olardıń barlıǵı tolıq jumısqa jaylastırıldı. Sonıń ishinde, 10 adamnıń turaqlı bántligi támiyinlendi, 7 adamǵa jeńilletilgen kredit hám 2 adamǵa ssuda ajıratıldı.

Sonday-aq, bıyılǵı jılı miynet bazarına kirip kelgen 80 pitkeriwshimizden 12 si joqarı oqıw orınlarınıń, 13 i professional bilimlendiriw hám 55 i mektep pitkeriwshileri bolıp tabıladı. Búgingi kúnde bul jaslardıń 85 procentiniń bántligi támiyinlendi.

Máhállemizde tek ǵana belsendi hám intaker jaslar menen islep qalmastan, olardıń mashqalaların úyreniw, kásip-óner hám shet tillerin úyreniwine járdemlesiw, isbilermenlik penen shuǵıllanıw tileginde bolǵan jaslarǵa jeńilletilgen kredit hám subsidiyalar ajıratıw, bántligin támiyinlew, awır turmıs sharayatındaǵı jaslarǵa materiallıq hám ruwxıy járdem kórsetiw ilajları belgilengen. Jaslardıń bos waqıtların mazmunlı ótkeriw maqsetinde kitapqumarlıq kesheleri, ushırasıwlar, hár qıylı sport jarısları ótkerilmekte.

Sonday-aq, jaslar arasında huqıqbuzarlıqlardıń aldın alıw, jaslardı hár qıylı ǵalabalıq tásirlerden saqlaw, erte neke hám onıń unamsız aqıbetleri haqqında keń kólemde úgit-násiyat jumısları alıp barılmaqta.