Жорий йилнинг 22 июль куни “Мўйноқ текстил” масъулияти чекланган жамиятига қарашли тикувчилик фабрикаси фойдаланишга топширилди.
Тадбирда Ўзбекистон Республикаси Президенти маслаҳатчиси Т.Худайбергенов, Қорақалпоғистон Республикаси Жўқорғи Кенгеси Раиси М.Ерниязов иштирок этиб, йиғилганларни янги корхона ишга тушиши муносабати билан табриклади.
Таъкидланганидек, Президентимизнинг Мўйноқ туманига бўлган алоҳида эътибори натижасида кўплаб ишлаб чиқариш корхоналари ишга туширилиб, фойдаланишга топширилмоқда. Жорий йилнинг февраль ойида қурилиши бошланган янги корхонада 350 нафар хотин-қизлар иш билан таъминланди. Бу ерга Хитой ва Туркия давлатларида ишлаб чиқарилган 320 дона замонавий тикув машиналари олиб келиб ўрнатилди. Компьютерлар ёрдамида ишлайдиган ушбу машиналарни эндиликда мўйноқлик ёшлар бошқаради.
Корхонада ишлаб чиқарилган маҳсулотларни маҳаллий аҳолига ва туманга ташриф буюраётган сайёҳларга сотишни йўлга қўйиш мақсадида махсус дўкон ишга туширилди. Корхона раҳбарларининг таъкидлаганидек, келгусида маҳсулот турлари кўпайтирилиб, чет элларга экспорт қилиш белгиланган.
— Янги фабриканинг ишга тушиши туман халқини, айниқса, хотин-қизларимизни янада қувонтирди, — дейди “Талли озек” маҳалла фуқаролар йиғини раиси Бийбихан Отамбетова. — Бизнинг ҳудудимизнинг ўзидан 40 нафар хотин-қизларнинг бандлиги таъминланди. Бундай ғамхўрлиги учун Президентимизга чексиз миннатдорлик билдирамиз.
Тадбир иштирокчилари янги фабрикада ишчилар учун яратилган шароитлар, ишлаб чиқарилаётган маҳсулотлар билан танишди.
Қорақалпоғистон хабар агентлиги.
