Қорақалпоғистон Республикаси Божхона бошқармаси маълумотларига кўра, божхона органлари томонидан шу йилнинг ўтган даври мобайнида ташқи иқтисодий алоқа иштирокчилари учун божхона тўловлари бўйича 775 миллиард 760 миллион сўмдан зиёд имтиёзлар қўлланилган.

Яқинда Божхона ходимлари Нукус шаҳрида ўз фаолиятини бошлаган “Nukus med tex” қўшма корхонасида бўлиб, бу ердаги иш жараёни билан яқиндан танишди.

Буюк Британия давлатининг “Medical capital” корхонаси билан биргаликда 4 миллион 900 минг АҚШ долларлик инвестиция ҳисобидан ишга тушган ушбу корхона йилига 240 миллион дона бир марталик шприц ҳамда 160 миллион дона тизим шлянгаларини ишлаб чиқариш қувватига эга. Шунинг­дек, операцияда қўлланиладиган қўлқопларни ишлаб чиқариш йўлга қўйилган бўлиб, келажакда гимодиализ аппаратини ишлаб чиқариш бўйича Хитойлик тадбиркорлар билан шартномалар тузилган. Корхонада 200 иш ўрни яратилган бўлиб, ходимлар икки сменада иш олиб боришмоқда. Тижорат банкдан 25 миллиард сўмлик кредит ҳисобидан иш бошлаган ушбу корхона ўз маҳсулотларини шу ойдан бошлаб ­экспортга чиқаришни режалаштирмоқда.