Сўнгги йилларда Қонликўл туманида кенг кўламдаги бунёдкорлик ва ободонлаштириш ишлари билан бирга туризм соҳасини ривожлантиришга катта эътибор қаратиляпти. Туманда маҳаллий ва чет эл сайёҳларининг эътиборини тортадиган бир қатор маданий ва ижтимоий объектлар янгидан ишга тушириляпти. 2018 йилда тадбиркор Темур Садиков ташаббуси билан ташкил қилинган «90-йиллар тарихи» деб номланган музей, ана шундай янги туристлик объектлардан ҳисобланади.

— Бизнинг янги музейимизда ўтган XX асрнинг 80-90 йилларида халқнинг кундалик ҳаётида фойдаланилган ҳар хил маркадаги телевизор, радио, магнитафон, фотоаппарат, компьютер, DVD плейер каби маиший техникалар ва муомалада бўлган пул бирликлари экспонат сифатида ўрин олган. Эътиборлиси, буюмларнинг барчаси аҳоли томонидан тўпланган. Шу кунгача музейимизга Япония, Франция, Россия, Қозоғистон, Қирғизистон, Туркманстон каби давлатлардан кўпгина сайёҳлар ташриф буюрди. Музей ёнида сайёҳларга қулай шароит яратиш мақсадида овқатланиш ўрнини ташкил қилганмиз, — дейди тадбиркор Темур Садиков.

Келгусида, музей қошидан ҳар хил сувинер ва ҳунармандчилик маҳсулотлари сотиладиган дўкон очилиши режалаштирилмоқда.

М.ҲАБИБУЛЛАЕВ олган сурат.