Аҳоли мурожаатлари билан ишлаш, одамларнинг муаммоли масалаларини ҳал этиш мақсадида Ўзбекистон Республикаси Президенти маслаҳатчиси ўринбосари А.Усмонов раҳбарлигидаги республика ишчи гуруҳи томонидан республикамизнинг шаҳар ва туманларида оммавий қабуллар ўтказилди.

Тадбирларда Президент Админис­трацияси, Олий суд, Бош прокуратура, Ички ишлар, Соғлиқни сақлаш, Халқ таълими, Мактабгача таълим ва бошқа вазирликлар, мутасадди ташкилотлар ҳамда ҳудудий сектор раҳбарлари иштирок этди. 

Сайёр қабулнинг дастлабки куни Нукус шаҳри ва Нукус тумани фуқаролари қабул қилинди. Тадбирда 393 нафар фуқаро 411 та масала бўйича мурожаат қилишди. Шундан 132 таси жойида ижобий ҳал этилди, 81 нафар фуқарога ҳуқуқий маслаҳат берилди. 168 мурожаатнинг ижроси назоратга олинди.

– Бугунги кунда аҳолини қийнаб келаётган муаммолардан бири бу ичимлик суви, – дейди Нукус тумани “Кердер” овул фуқаролар йиғинидан Т.Ережепов. – Ушбу мурожаатим тегишли соҳа раҳбарлари томонидан кўриб чиқилди ва Осиё тараққиёт банкининг молиявий кўмагида амалга оширилаётган лойиҳа асосида келгуси йилда ичимлик суви тармоғи тортиб бериладиган бўлди. 

– Ички ишлар идораларида хизмат қилиш болаликдан орзуим эди, – дейди Нукус шаҳридан Ж.Муратбоев. – Оммавий қабулда Ўзбекистон Республикаси Ички ишлар вазирлиги масъул ходимларига ушбу масалада мурожаат этдим ва Нукус шаҳар Ички ишлар органлари фаолиятини мувофиқлаштириш бош­қармаси Ҳуқуқбузарлик профилактикаси бўлимига профилактика инспектори ёрдамчиси лавозимига ишга қабул қилинадиган бўлдим. Бундан жудаям хурсандман. 

Шунингдек, сайёр қабуллар ­Тахиатош, Шўманой ва Хўжайли туманлари аҳолиси учун Тахиатош туманида, Бўзатов ва Кегейли туманлари аҳолиси учун Бўзатов туманида бўлиб ўтди.

Тахиатош тумани Санитария-эпидемиологик осойишталик маркази ходими Зиёда Утегенова «штат қисқарди» деган баҳона билан ўтган йилнинг декабрь ойидан буён ишсиз қолган эди. Шу кунгача турли жойларга мурожаат қилди, лекин ижобий ечим топмади. Сайёр қабулда унинг мурожаати ижобий ҳал этилиб, аввалги иш жойига қайта тикланди. 

Бўзатов тумани “Қусханотов” овул фуқаролар йиғини ҳудудида яшовчи Далибай Айгелдиев 1986 йили туғилган фарзандига ногиронлик нафақасини тайинлаш юзасидан мурожаат қилди. Унинг мурожаати Соғлиқни сақлаш вазирлиги мутахассислари томонидан ўрганиб чиқилиб, ­тегишли ёрдам бериладиган бўлди.

Қорақалпоғистон Республикаси Ички ишлар вазирлиги масъул ходимлари томонидан аҳоли билан суҳбатлар ўтказилиб, уларни  қийнаб келаётган муаммолар ўрганилди ва  ижобий ҳал қилиш чоралари кўрилди. 

Жумладан, икки кун давомида фуқаролардан 62 та мурожаат келиб тушган бўлса, шундан 15 таси жойида ижобий ҳал этилди. Қўшимча ўрганиш талаб этиладиган 13 та мурожаат тегишли мутасадди идоралар вакиллари томонидан назоратга олинди. 34 та мурожаат бўйича ҳуқуқий маслаҳат берилди.

Мурожаатларда асосан фуқаролик олиш, биометрик паспорт расмийлаштириш, соҳа ходимларига миннатдорчилик, терговга қадар текширув ҳамда суриштирув ҳаракатларидан норозилик масалалари кўтарилди. Тадбир доирасида фуқаролиги бўлмаган шахс сифатида яшаб келаётган 10 нафар фуқарога Ўзбекистон Республикаси фуқаролик паспорти тантанали равишда топширилди. 

Тадбирда Қорақалпоғистон ­Республикаси Вазирлар Кенгаши Раиси Қ.Сариев иштирок этди. 

Д.Абибуллаев,

Қорақалпоғистон ахборот агентлиги шарҳловчиси.