Қорақалпоғистон Республикаси Жўқорғи Кенгеси Раиси М.Камалов Тўрткўл туманида бўлиб, Боғёп-1 каналини қайта тиклаш лойиҳаси билан танишди ва «Ёшлар дафтари»га киритилган ёшлар билан учрашди.
«Жанубий Қорақалпоғистонда сув ресурсларини бошқаришни яхшилаш» лойиҳаси доирасида амалга оширилаётган «Боғёп-1» каналини қайта тиклаш лойиҳасининг умумий баҳоси 9,951 миллион АҚШ долларини ташкил этади. Бош пудратчи Хитойнинг «China Railway 20th Bureau Group Co., Ltd.» компанияси бўлган канални қайта тиклаш лойиҳасида 1108 минг куб метр тупроқ ва 14.2 минг куб метр бетон ишларини амалга ошириш белгиланган. Иншоотнинг узунлиги 18.4 километр бўлиб, секундига 35 кубометр сув ўтказиш қувватига эга.
Шуни ҳам таъкидлаб ўтиш жоизки, Тўрткўл тумани, унга яқин бўлган ҳудудларда ер ости сувларининг кўтарилиши натижасида келиб чиқадиган салбий ҳолатларнинг олдини олиш мақсадида каналнинг 5,7 километр қисми бетон билан қопланди.
Шунингдек, каналда 4 та сув тўсувчи гидротехник иншоот, 17 та сув олиш иншооти, 2 та автомобил йўли кўприги ва 2 та пиёдалар кўприги қурилмоқда. Канал ва табиий газ, электр узаткич линиялари, ичимлик суви қувурлари ва алоқа кабеллари кесишмаларининг реконструкция ишлари давом этмоқда.
Қорақалпоғистон Республикаси Жўқорғи Кенгеси Раиси М.Камалов «Шўрахон» овул фуқаролари йиғини ҳудудидаги “Элбек Азиз” фермер хўжалигида “Ёшлар дафтари”га киритилган ишсиз ёшларга ер ажратиш тадбирида иштирок этди. Шу ерда деҳқончилик қилиш истагида бўлган ёшлар билан суҳбатлашди. Ушбу фермер хўжалигида 8 нафар ёшга 2,4 гектар ер майдони ажратиб берилди.
Шундан сўнг Республика раҳбари «Бунёдкор-мерос» масъулияти чекланган жамияти томонидан амалга оширилган «Ўнг қирғоқ магистрал каналини тозалаш» ишлари ва Туямўйин сув омборида шўр ювиш даври учун тўпланган сув захирасини кўздан кечирди.
Д.Абибуллаев.
