Ёшлик инсон умрининг энг шиддатли ва навқирон палласидир. Аммо, имкониятлардан тўғри фойдаланмай, ножўя қадам босиш қимматга тушишини ҳамма ҳам билавермайди. Англаб етганида эса, афсуски кеч бўлади. Шу боис ҳам халқимизда “Сўнгги пушаймон ўзингга душман” деган ибратли нақл бор.
Хўжайли туманида туғилган Ф.Х 2019 йилнинг 6 июль куни ишлаб пул топиш мақсадида Россия Федерациясига боради. У ерда мавсумий ишда ишлаб, ўзининг уяли телефонидаги интернетнинг “You Tube” видео-хостинг, “Instagram” ижтимоий тармоғи, “Telegram” мессенджери орқали “Содиқ Самарқандий” ҳамда “Абдуллоҳ Зуфар” маърузаларини тинглаб борган. Шунингдек, ўзининг уяли алоқа телефон аппаратидан интернет ижтимоий тармоғининг “Instagram” саҳифасидаги профилига ақидапарастлик ғоялари билан йўғрилган видео материалларни жойлаштириб, сақлаб келган. Шундай қилиб Ф.Х 2021 йилнинг 17 февраль куни Россия Федерациясининг Пулкова халқаро аэропортидан “Санкт-Петербург-Тошкент” йўналиши бўйича НУ-3632-сонли рейс билан Тошкент шаҳридаги Ислом Каримов номидаги Тошкент халқаро аэропортига келганида ХТБ ТЭҚКБ ходимлари томонидан профилактик суҳбат олиб борилган. Суҳбат чоғида Ф.Х.нинг жаҳон ахборот тармоғидан фойдаланиб, норасмий диний ташкилотларга тааллуқли бўлган маърузаларни сақлаб келганлиги аниқланган.
Ушбу маъруза ва фикрлар Ўзбекистон Республикаси Вазирлар Маҳкамаси ҳузуридаги Дин ишлари бўйича қўмитанинг 2021 йил 2 мартдаги экспертлик хулосасига кўра таъқиқланганлиги аниқланган. Натижада, Ф.Х. Ўзбекистон Республикаси Жиноят Кодексининг тегишли моддалари билан айбдор деб топилди.
Дарҳақиқат, бу каби ҳолатлар кимгадир сабоқ бўлса ажаб эмас. Зеро, ҳар қандай жиноятга жазо муқаррардир.
Ф.Шукуруллаева.
