Berdaq atındaǵı Qaraqalpaq mámleketlik universitetinde gazeta redakciyalarında jasalma intellekt texnologiyalarınan nátiyjeli paydalanıw boyınsha seminar-trening shólkemlestirildi. Onda respublikamızdaǵı gazeta hám jurnallardıń bas redaktorları, Qaraqalpaq filologiyası hám jurnalistika fakulteti hám de Mass-media hám ǵalaba kommunikaciyalar kafedrası professor-oqıtıwshıları, sonday-aq, jas jurnalistler qatnastı.
Bizge belgili, 2025-jıldıń 19-dekabr kúni Qaraqalpaqstan Respublikası Joqarǵı Keńesiniń Baslıǵı Amanbay Orınbaevtıń ǵalaba xabar qurallarınıń wákilleri, dóretiwshiler hám sociallıq tarmaq belsendileri menen ushırasıwı bolıp ótken edi. Ushırasıwda gazeta hám jurnallardıń jumısına zamanagóy texnologiyalardı engiziw, málimleme tarqatıw sistemasın jetilistiriw boyınsha áhmietli wazıypalar belgilep berildi. Bul seminar usı wazıypalardıń orınlanıwın támiyinlew maqsetinde shólkemlestirildi.
Ilaj dawamında filologiya ilimleriniń doktorı Qumar Bekniyazova hám magistrant Biybisara Jartibaeva jasalma intellekt tiykarında tayarlanǵan “Fakultet JI” gazetasınıń prezentaciyasın ótkerip, onı jaratıwda qollanılǵan AI baǵdarlamaları hám olardıń imkaniyatları haqqında maǵlıwmat berdi.
Sonday-aq, “Qoraqalpog‘iston tongi” gazetasınıń bas redaktorı Ǵ.Atajanov “Gazeta jumısında zamanagóy texnologiyalar hám jasalma intellekt imkaniyatlarınan paydalanıw” temasında prezentaciya ótkerdi. Onda virtual baslawshı – “Tongotar”dıń jaratılıwı, onıń atalıwı, videokontent tayarlawdaǵı áhmieti hám redakciya jumısına innovaciyalıq sheshimlerdi engiziw tájiriybesi haqqında tolıq maǵlıwmat berildi.
Seminardıń tiykarǵı maqseti ǵalaba xabar quralları wákillerin jasalma intellekt imkaniyatları menen tanıstırıw, málimleme tayarlaw procesinde tekst jaratıw hám redaktorlaw, maǵlıwmatlardı jedel tallaw, vizual materiallar tayarlaw sıyaqlı kónlikpelerdi qáliplestiriwden ibarat boldı.
Treningtiń ámeliy bóliminde qatnasıwshılar hár qıylı jasalma intellekt platformaları járdeminde maqala jaratıw, súwret hám vizual kontent tayarlaw, analitikalıq materiallardı qısqa waqıt ishinde islep shıǵıw boyınsha shınıǵıwlarda qatnastı. Qánigeler tárepinen media redaktorları ushın jasalma intellektten nátiyjeli paydalanıw boyınsha ámeliy usınıslar berildi.
Sonıń menen birge, jasalma intellektten paydalanıwda ádep-ikramlılıq normaları, avtorlıq huqıq, málimleme qáwipsizligi hám jurnalisttiń juwapkershiligi sıyaqlı áhmietli máselelerge ayrıqsha itibar qaratıldı. Ashıqtan-ashıq sóylesiw dawamında qatnasıwshılar ózlerin qızıqtırǵan sorawlarǵa qánigelerden hár tárepleme juwap aldı.
Juwapkerlerdiń atap ótkenindey, bunday seminar-treningler jurnalistika tarawında innovaciyalıq kózqaraslardı keńnen engiziw, málimleme tayarlaw sapasın arttırıw hám xalıqqa operativ, isenimli málimleme jetkeriw sistemasın jetilistiriwde úlken áhmietke ie.
R.MADRIMOVA.
tayarladı.
